Енергетскиот гигант British Petroleum планира значително да го намали својот тим за тргување со гас преку гасоводи, додека сè повеќе се фокусира на растечкиот пазар на течен природен гас (ЛНГ), пренесува агенцијата Ројтерс, повикувајќи се на извори запознаени со плановите на компанијата.
Според информациите, BP ќе отпушти околу 20 вработени од секторот за тргување со гас преку гасоводи, а преостанатиот дел од тимот ќе биде интегриран во одделот за ЛНГ, кој бележи брз раст.
Овој потег ја отсликува пошироката трансформација на европскиот енергетски пазар по 2022 година, кога Европа почна забрзано да се откажува од рускиот гас што се транспортира преку гасоводи и се насочи кон увоз на течен природен гас.
Компанијата официјално не ги коментираше информациите.
Европските енергетски компании со децении развиваа моќни трговски тимови за да профитираат од разликите во цените на гасот меѓу различни региони и пазари. Токму ваквите трговски операции им донесоа милијарди долари заработка за време на последните енергетски кризи и глобалните нарушувања во снабдувањето.
Сепак, според изворите, намалениот обем на тргување со гас преку гасоводи во Европа е една од главните причини за реструктурирањето во BP.
ЛНГ станува клучен дел од стратегијата на компанијата, која во последниот период се обидува да го намали долгот и повторно да се фокусира на профитабилни проекти во секторот на нафта и гас, по неуспешниот обид за поголем пробив во обновливите извори на енергија.
BP е меѓу водечките компании на глобалниот ЛНГ пазар, со силно присуство во Европа, Азија и Блискиот Исток. Компанијата има долгорочни договори за снабдување со клиенти во Јапонија, Јужна Кореја, Кувајт, Сингапур, Тајван и Австралија.
Извор: Ројтерс
