Европската индустриска асоцијација која ги претставува компаниите и организациите што работат во секторот на ветерната енергија, WindEurope ја поздрави објавата на „Европскиот пакет за мрежи“ минатата недела, оценувајќи дека тој претставува пресвртен момент за развојот на ветерната енергија во Европа. Според организацијата, модернизацијата на електроенергетските мрежи е неопходна за интеграција на нови капацитети и за постигнување на целите за енергетска сигурност и конкурентност.
Директорот на WindEurope, Џајлс Диксон, предупреди дека мрежната инфраструктура е „најголемото тесно грло“ за напредок на ветерната енергија. Во моментов, речиси 500 гигавати ветроелектрани низ Европа чекаат дозволи за приклучување, додека недоволните инвестиции резултираат со ограничување на производството од обновливи извори и поголеми трошоци за потрошувачите.
„Обновливиот енергетски систем ќе биде многу поевтин за Европа и покрај дополнителните трошоци за мрежи, складирање и електрификација. Но не можеме да имаме повеќе ветерна енергија без повеќе мрежи,“ изјави Диксон, додавајќи дека новиот пакет носи побрзо планирање, подобра предвидливост и поголема сигурност за инвеститорите.
Европа не гради доволно ветерни капацитети
Денес ветерната енергија обезбедува 20% од европската електрична енергија, но до 2030 година тој удел треба да порасне на 34%, а до 2050 да надмине 50%. WindEurope предупредува дека без длабока реформа на мрежите, овие цели се недостижни.
Затоа, организацијата силно го поддржува преминот од принципот „прв дојден, прв услужен“ кон моделот „прв подготвен, прв услужен“, кој треба да ги елиминира шпекулативните „зомби-проекти“ и да овозможи побрзо поврзување на зрели, реални инвестициски иницијативи.
WindEurope особено го поздравува фактот што ЕК ќе игра поголема улога во планирањето преку нови сценарија за развој на европската мрежа, кои ќе бидат усогласени со климатските цели за 2040 и 2050 година. Ова, според организацијата, е „критичен услов“ за навремена изградба на инфраструктура што ќе може да прими големи количини ветерна енергија – особено од офшор парковите.
Пакетот предвидува и значително зголемување на финансирањето преку европскиот буџет и нова стратегија за привлекување приватни инвестиции во 2026 година. WindEurope смета дека тоа е неопходно за надминување на долгогодишното заостанување во инвестициите во мрежите.
Организацијата ја поддржува и предложената директива за забрзување на дозволите, особено мерките за:
- полесно одобрување на обновени (repowered) ветерни паркови,
- подобра интеграција на складишта и хибридни системи,
- воведување единечен дигитален национален портал за сите чекори во постапката.
WindEurope нагласува дека ваквите мерки ќе придонесат за транспарентност и ефикасност, но предупредува дека забрзувањето не смее да ја поткопа инвестиционата сигурност и јавната поддршка.
WindEurope истакнува дека успешната примена на Пакетот ќе зависи од земјите членки, кои треба брзо да ги имплементираат препораките. Организацијата најавува блиска соработка со владите и индустријата за да се обезбедат мрежи што ќе можат да ја поддржат енергетската транзиција заснована на висок удел од ветерна енергија.
Извор: WindEurope.org
