Подгорица. 5 јули 2025 – Владата на Црна Гора соопшти дека ја одобрила позајмицата од 50 милиони евра за државната енергетска компанија Електропривреда Црне Горе (EPCG), која ќе биде искористена за финансирање на увозот на електрична енергија во текот на 2025 година. Средствата ќе бидат обезбедени преку заем од австриската Erste Group Bank.
Причина за зголемената потреба од увоз е долготрајниот ремонт на единствената термоелектрана во земјата – Пљевља, која беше исклучена од мрежата на 31 март годинава. Реконструкцијата, вредна 70 милиони евра, има за цел да го продолжи животниот век на централата и да ги усогласи нејзините капацитети со современите еколошки стандарди. Очекувањата се дека централата ќе се врати во функција на 15 ноември.
Според директорот на EPCG, Иван Булатовиќ, поради седум и пол месечното запирање на Пљевља, кое инаку обезбедува околу 40% од вкупната потрошувачка на електрична енергија во Црна Гора, компанијата ќе треба да увезе околу 800 GWh струја во 2025 година. Вредноста на овој увоз се проценува на 80 милиони евра. 
„Се очекува EPCG да ја заврши 2024 година со значителна загуба токму поради застојот во работата на термоцентралата,“ изјави Булатовиќ.
Вкупниот инсталиран капацитет на производните објекти на EPCG изнесува 874 MW, од кои 649 MW доаѓаат од двете големи хидроелектрани – Перуќица и Пива. Термоелектраната Пљевља придонесува со 225 MW, додека остатокот го покриваат неколку мали хидроелектрани.
Од Владата на Црна Гора потенцираат дека овој чекор има за цел да обезбеди сигурно и континуирано снабдување со електрична енергија за граѓаните и стопанството во пресрет на зимската сезона и зголемената потрошувачка.
Извор: SEENews.com
