Шпанската Национална комисија за пазари и конкуренција (CNMC) отвори истрага за можни прекршувања на правилата за конкуренција на енергетските пазари во земјата, со фокус на практики што би можеле да претставуваат злоупотреба на доминантна позиција.
Како што соопшти регулаторното тело, предмет на проверка се можни дискриминаторски практики со кои на оператори од трети страни им се ограничува пристапот до шпанскиот енергетски пазар и можноста да учествуваат во конкуренцијата.
Во рамки на постапката, меѓу 26 и 29 октомври, инспектори на CNMC извршиле претреси во седиштето на една неименувана групација што работи во енергетскиот сектор. Комисијата не го откри името на компанијата ниту соопшти дополнителни детали за предметот на истрагата.
Од регулаторот нагласуваат дека инспекциите се прелиминарен чекор во истражната постапка и сами по себе не значат дека компанијата ги прекршила правилата или дека ќе биде прогласена за виновна.
Доколку истрагата потврди постоење на забранети практики, тие би можеле да бидат квалификувани како сериозно прекршување на правилата за конкуренција. Во таков случај, на компанијата може да ѝ биде изречена парична казна до 10% од нејзините годишни приходи.
Истрагата се однесува на пристапот до енергетскиот пазар и условите под кои различните оператори можат да се натпреваруваат, прашања што се особено важни за обезбедување еднаков третман на учесниците и спречување ограничување на конкуренцијата.
Извор: CNMC.es
