Сметките за електрична енергија во Шпанија во август се зголемиле за повеќе од 19% во однос на истиот месец лани, под влијание на повисоката потрошувачка за време на топлотните бранови и растот на цените на природниот гас.
Со тоа августовската сметка е највисока за овој месец од 2022 година, кога европскиот енергетски пазар беше погоден од сериозна криза по руската инвазија врз Украина.
За просечен корисник на регулираната тарифа PVPC, сметката во август изнесува 88,81 евро, што е за 19,04% повеќе од 74,04 евра во август минатата година. Тоа значи зголемување од речиси 14,8 евра за еден месец.
Во однос на јули, сметката е повисока за 3,65%, односно за околу 3,13 евра.
Пресметката се однесува на просечен потрошувач со договорена моќност од 4,4 киловати и годишна потрошувачка од 3.900 киловат-часови. Во симулацијата 30% од потрошувачката е распределена во најскапите часови, 20% во средната тарифа, а 50% во евтините часови.
Од вкупната августовска сметка, 11,41 евро отпаѓаат на фиксниот дел, 56,92 евра на потрошувачката, 3,53 евра на данокот на електрична енергија, додека ДДВ и останатите давачки изнесуваат 15,41 евро, според податоците од споредбената алатка на шпанската Национална комисија за пазари и конкуренција (CNMC).
Повисоките цени на гасот го зголемуваат притисокот
Растот на сметките се совпадна со значително поскапување на електричната енергија на големопродажниот пазар. Просечната цена на струјата на шпанскиот пазар во август е над 118 евра за мегават-час, што е највисоко ниво од февруари 2023 година.
Цената била над 100 евра/MWh речиси секој ден во текот на месецот, со само четири исклучоци. Во периодите со силно производство од соларните централи цените на моменти се приближувале до нула, а имало и негативни цени.
Спротивно на тоа, во ноќните часови цените надминувале 200 евра/MWh, кога соларното производство е прекинато, а потребата од други извори за производство на електрична енергија расте.
Дополнителен фактор е природниот гас, чија цена во август продолжила да расте поради неизвесноста околу снабдувањето од Блискиот Исток, состојбата со европските резерви пред зимата и зголемената летна побарувачка. На шпанскиот гасен пазар Mibgas цената надминала 66 евра/MWh.
Иако соларното производство има значително учество во покривањето на дневната побарувачка, во часовите без сончева енергија поголема улога имаат гасните комбинирани централи. Нивното учество во производството влијае врз цената на електричната енергија, заедно со цената на емисиите на CO₂.
ДДВ повторно 21%
На повисоката сметка влијаеше и враќањето на редовната стапка на ДДВ од 10% на 21% од 1 јуни, откако истече привременото намалување воведено како дел од мерките за ублажување на последиците од енергетската криза.
Шпанската влада, сепак, воведе механизам со кој даночните олеснувања може повторно да се активираат доколку растот на цените на електричната енергија и гасот биде особено изразен.
Според механизмот, доколку специфичниот индекс на потрошувачките цени за електричната енергија во одреден месец биде повеќе од 15% повисок од истиот месец претходната година, повторно би се активирале мерките за намалување на ДДВ на електричната енергија, природниот гас, пелетите и огревното дрво од 21% на 10%.
Во исто време, специјалниот данок на електричната енергија би се намалил од 5,1% на 0,5%.
Извор: Еlperiodicodelaenergia.com
