Нафтената индустрија на Србија (НИС) оствари позитивен финансиски резултат во првиот квартал од годинава, и покрај, како што наведува компанијата, исклучително тешките услови за работење. Во исто време, хрватската ИНА Група пријави загуба од 2,3 милиони евра, наспроти добивка во истиот период лани.
Според објавените финансиски извештаи, приходите од продажба на НИС во периодот јануари–март се намалиле за 8,4%, иако цената на суровата нафта бележеше раст, особено во март. Падот се должи пред сè на намален обем на промет.
Сепак, профитабилноста е подобрена – EBITDA порасна за 29% на 11 милијарди динари, додека нето-добивката се зголеми за 87% и достигна 2,8 милијарди динари.
И покрај позитивниот резултат, НИС продолжува да губи пазарен удел. Учество на вкупниот пазар падна на 57%, од околу 80% пред најавите за американски санкции. Пад е забележан и во малопродажбата, каде уделот изнесува 43%, наспроти околу 50% пред кризата.
Во март, поради воените случувања во Иран, побарувачката за гориво нагло порасна за околу 15%, особено во малопродажбата, но компанијата не успеала целосно да го искористи овој раст поради отежната наплата на бензинските станици.
Преработката во рафинеријата е намалена за околу 25%, додека вкупниот промет на нафтени деривати опаднал за 18%. Во меѓувреме, компанијата го намалила и долгот кон банките – од 540,4 милиони евра лани на 373,7 милиони евра заклучно со март годинава.
Акциите на НИС не се тргуваат на Белградската берза од јануари минатата година. Во меѓувреме, американскиот ОФАК го одобри барањето на унгарскиот МОЛ за преземање контролен удел, а рокот за реализација на трансакцијата е продолжен до 22 мај.
Во Хрватска, пак, ИНА Група во првиот квартал оствари приходи од 876,7 милиони евра, што е намалување од 5% на годишно ниво. Оперативните расходи изнесуваат 875,5 милиони евра. EBITDA достигна 70 милиони евра, што е пад од 17% во споредба со истиот период лани.
Од компанијата посочуваат дека почетокот на 2026 година бил обележан со пониски цени на гасот, а потоа и со геополитички тензии на Блискиот Исток, кои предизвикале нагло зголемување на цените на енергенсите.
Сегментот рафинерија и маркетинг останал стабилен, додека во март повторно била воведена регулатива за максимални малопродажни цени на горивата. По замена на катализатор, сите постројки во Рафинеријата во Риека се повторно пуштени во работа и функционираат со полн капацитет.
ИНА бележи и раст од 2,3% во производството на нафта и гас, поттикнат од инвестиции и нови бушотини, особено во Хрватска и Египет. Вкупните капитални инвестиции достигнале 76 милиони евра, значително повеќе од лани.
Компанијата продолжува со вложувања во енергетска транзиција, вклучително и проект за производство на зелен водород во Риека, вреден 61 милион евра, делумно финансиран преку национални и европски фондови.
И покрај тековните предизвици, од ИНА оценуваат дека работењето во првиот квартал било стабилно, со фокус на инвестиции и долгорочен развој.
Енергетика 24
