Скопје. 18 мај 2026 – Во април 2026 година, согласно податоците на Националниот оператор на пазар на електрична енергија – МЕМО, од 177 повластени производители на електрична енергија од обновливи извори во земјава произведени се 63.164 MWh електрична енергија, што претставува највисоко месечно производство во текот на 2026 година.
Притоа, од 92 мали хидроцентрали произведени се 40.995 MWh, од 79 фотоволтаични електрани 1.585 MWh, од две ветерни електрани 19.184 MWh, додека од пет термоелектроцентрали на биогас и биомаса произведени се 1.400 MWh.
Учеството на електричната енергија произведена од повластени производители од обновливи извори во вкупниот електроенергетски биланс изнесува 12,59%, што е највисоко учество во првите четири месеци од годинава.
Во споредба со март 2026 година, кога беа произведени 46.028 MWh, во април е регистриран значителен раст на производството од околу 37%. Главен двигател на овој пораст се малите хидроцентрали, кои во услови на поповолна хидрологија и зголемени дотечни води бележат највисоко производство во годинава. Истовремено, раст бележат и ветерните електрани, додека производството од фотоволтаичните електрани останува стабилно со постепено сезонско зголемување.
Податоците укажуваат дека со влезот во пролетниот период се зајакнува улогата на обновливите извори во домашното производство на електрична енергија, што придонесува за намалување на потребата од дополнителен увоз и за поголема стабилност на електроенергетскиот систем.
Вкупно инсталираната моќност на повластените производители на електрична енергија од обновливи извори изнесува 177.793 MW.
МЕМО е балансно одговорна страна за повластените производители кои користат повластени тарифи за производство на електрична енергија од обновливи извори.
Извор: МЕМО
