Европската банка за обнова и развој (ЕБОР) ќе обезбеди до 120 милиони евра за развој, изградба и работа на голем хибриден енергетски проект во Романија, кој комбинира соларна електрана од 342 мегавати и батериски систем за складирање електрична енергија со моќност од 150 MW и капацитет од 300 MWh.
Проектот „Părău 2“, во округот Брашов, го развива компанијата Econergy, а вкупниот пакет на должничко финансирање може да достигне 229 милиони евра. Во него, покрај ЕБОР, учествуваат Црноморската трговска и развојна банка, OTP Bank и Exim Banca Românească.
Финансирањето на ЕБОР се состои од заем „А“ до 57 милиони евра и заем „Б“ до 63 милиони евра. Дополнителна поддршка обезбедува Европската Унија преку програмата InvestEU, со гаранција до 115 милиони евра, која има цел да ги намали ризиците поврзани со приходите од продажбата на произведената електрична енергија на пазарот.
Од ЕБОР оценуваат дека проектот ќе има значајна улога во зголемувањето на производството на електрична енергија од обновливи извори, но и во подобрувањето на флексибилноста и стабилноста на романскиот електроенергетски систем.
Батерискиот систем ќе овозможи дел од соларната енергија да се складира и да се испорачува во периоди на поголема побарувачка. Истовремено, ќе може да обезбедува услуги за балансирање и помошни услуги за електроенергетската мрежа, што ќе го олесни приклучувањето на нови, варијабилни обновливи извори.
Проектот е поддржан и преку романската шема за договори за разлика (CfD), развиена со техничка помош од ЕБОР, чија цел е да овозможи изградба на 5 GW нови соларни и копнени ветерни капацитети.
Соларната електрана во првата аукција обезбедила 125 MWac преку CfD, со договорена цена од 49,4 евра за MWh во период од 15 години. Преостанатиот дел од производството ќе се продава по пазарни услови.
ЕБОР нагласува дека ова е првпат банката да финансира хибриден проект во Романија кој директно комбинира соларна електрана со батериски систем за складирање.
Според банката, инвестицијата ќе придонесе кон намалување на зависноста од фосилни горива за покривање на пиковите во потрошувачката и ќе ја зајакне енергетската безбедност на Романија.
ЕБОР досега има инвестирано повеќе од 12,7 милијарди евра во Романија преку над 600 проекти, со што земјата е меѓу значајните пазари на банката во регионот.
Извор: EBRD.com
