Извозот на природен гас од Грција во првите шест месеци од 2026 година се зголемил трикратно во однос на истиот период лани, потврдуваат најновите податоци на грчкиот оператор за пренос на природен гас ДЕСФА. Ваквиот раст дополнително ја зацврстува позицијата на Грција како еден од клучните енергетски центри и транзитни коридори за снабдување со природен гас во Југоисточна Европа.
Вкупната побарувачка за природен гас во земјата достигнала 43,09 терават-часови (TWh), што претставува раст од 15,1% во споредба со 37,45 TWh во првата половина од 2025 година. Главниот двигател на овој пораст не е домашната потрошувачка, туку значително поголемиот извоз.
Извозот достигнал 8,72 TWh, наспроти 2,86 TWh една година претходно, односно речиси трипати повеќе. Од DESFA оценуваат дека ваквите резултати ја потврдуваат сè поважната улога на Грција како регионален енергетски јазол и порта за испорака на природен гас кон земјите од Југоисточна Европа.
Во исто време, домашната потрошувачка останала речиси непроменета и изнесувала 34,37 TWh, што е благо намалување од 0,64% во споредба со 34,59 TWh во истиот период минатата година. Намаленото користење на гас за производство на електрична енергија било делумно компензирано со поголема побарувачка од индустријата, секторот за компримиран природен гас (CNG) и дистрибутивните мрежи.
Најголем влезен пункт за увоз на природен гас останува ЛНГ терминалот Ревитуса, преку кој пристигнале 18,61 TWh, што претставува раст од 27% на годишно ниво и учество од 43% во вкупниот увоз.
Следуваат влезните точки Сидирокастро со 15,47 TWh и Неа Месимврија со 5,53 TWh. Особено значителен раст бележи и пловечкиот терминал за складирање и регасификација (FSRU) кај Александрополис, преку кој биле увезени 3,46 TWh природен гас – повеќе од трипати повеќе во споредба со истиот период во 2025 година.
Податоците укажуваат дека Грција продолжува да го зајакнува своето значење во регионалното снабдување со природен гас, потпирајќи се на развојот на ЛНГ инфраструктурата и на зголемените прекугранични испораки кон соседните пазари.
Извор: Desfa.gr
