Заеднички правила за прекуграничната трговија со природен гас, координирано функционирање на клучните снабдувачки правци и усогласување со европските планови за постепено укинување на рускиот гас беа во фокусот на Форумот за природен гас на Енергетската заедница одржан во понеделникот во Виена.
Со форумот претседаваше Европската комисија, а на него учествуваа регулатори, оператори на системи и претставници на институциите, кои разговараа за регионалните приоритети во областа на природниот гас.
„Како што нарушувањата стануваат вообичаени, фрагментацијата нè прави поранливи. Интеграцијата сега ќе ѝ обезбеди на Европа заемна енергетска сигурност“, изјави Артур Лорковски, директор на Секретаријатот на Енергетската заедница.
Во фокусот беше воспоставувањето заеднички правила за гасниот пазар на границите меѓу Европската Унија и земјите од Енергетската заедница кои не се членки на ЕУ.
Од август, земјите членки на ЕУ почнаа да ги применуваат мрежните кодекси, односно заедничките правила за прекугранична трговија со природен гас, на сите граници, вклучително и со земјите од Енергетската заедница. Земјите од Енергетската заедница, пак, почнаа да применуваат реципрочни правила.
На форумот е разгледан и напредокот во примената на овие правила, при што биле идентификувани регулаторните и оперативните празнини што сè уште постојат на прекуграничните точки за поврзување.
Посебно внимание било посветено на Трансбалканскиот гасовод и напорите за негово комерцијално функционирање. На форумот бил поздравен напредокот во овој процес, при што е нагласен потенцијалот на гасоводот за диверзификација на снабдувањето и поврзување на пазарите, вклучително и на Молдавија и Украина.
Од октомври се очекуваат поконкурентни тарифи за користење на Трансбалканскиот гасовод. Форумот повика на доследна примена на европските мрежни кодекси, заеднички правила за резервирање на капацитетите на гасоводот и балансирање на гасот, како и фер и отворен пристап за сите корисници долж трасата.
На состанокот се разговарало и за долгорочната перспектива на гасниот сектор во регионот. Европската Унија планира да го прекине користењето на рускиот гас до 2027 година, а студија на Секретаријатот на Енергетската заедница покажала дека сигурноста на снабдувањето би се задржала и во најнеповолни сценарија доколку договорните страни го следат истиот правец.
Форумот го поздравил напредокот во рамките на REPowerEU и планот на ЕУ за прекин на зависноста од руската енергија и повикал земјите од Енергетската заедница да се усогласат со овие цели.
Европската комисија во моментов подготвува можна адаптација на REPowerEU, прилагодена на условите во Енергетската заедница.
Извор: Energy-community.org
