ЕУ го олеснува издавањето дозволи за обновливи извори, мрежи и складирање

Европската Унија постигна начелен договор за забрзување на постапките за издавање дозволи за проекти за обновливи извори на енергија, електроенергетски мрежи и капацитети за складирање, со цел да се скратат повеќегодишните административни доцнења и да се забрза изградбата на енергетската инфраструктура.

Советот на ЕУ соопшти дека договорот е постигнат во средата со Европскиот парламент и претставува дел од поширокиот пакет за европските електроенергетски мрежи, претставен кон крајот на 2025 година. Неговата цел е модернизација и проширување на енергетската инфраструктура, како и поддршка на транзицијата на Унијата кон климатска неутралност.

Со изменетите правила, земјите членки ќе можат да применуваат забрзани постапки за реализација на проекти за обновлива енергија и електроенергетски мрежи, преку нивно прогласување за проекти од повисок јавен интерес.

РЕКЛАМА

Потребата од вакви измени произлегува од растечката неусогласеност меѓу брзото ширење на обновливите извори и развојот на мрежната инфраструктура. Иако европските земји инвестираа значителни средства во производство на електрична енергија од ветер и сонце, проширувањето и модернизацијата на мрежите не го следеа истиот ритам.

Како последица, во делови од Европа се појавуваат ограничувања за производство од ветерни и соларни електрани, што доведува до неискористување на достапната електрична енергија и придонесува за повисоки трошоци на енергетскиот систем.

Новата рамка треба да ги олесни постапките не само за изградба на нови производствени капацитети, туку и за електроенергетската инфраструктура и системите за складирање, кои се неопходни за интеграција на поголеми количини енергија од обновливи извори.

Договорените измени се однесуваат на директивите за обновлива енергија, електроенергетскиот пазар и пазарот на гас.

Сепак, постигнатиот договор сè уште не значи дека новите правила стапуваат во сила. Тие треба формално да бидат одобрени од Советот на ЕУ и Европскиот парламент, по што земјите членки ќе имаат рок од година и пол да ги вградат во националното законодавство.

Со оваа иницијатива ЕУ настојува да го отстрани еден од клучните структурни проблеми на енергетската транзиција – бавната изградба на мрежи и инфраструктура што треба да го следат растот на обновливите извори и да овозможат нивно поефикасно користење.

Извор: Европска Комисија

Сподели:

Добивај ги најважните вести на е-маил