Хрватска би можела во следните две години да започне со испорака на природен гас од ЛНГ терминалот на островот Крк до Германија, изјави хрватскиот премиер Андреј Пленковиќ, посочувајќи дека за реализација на коридорот останува потребно да се усогласат Хрватска, Словенија и Австрија.
Пленковиќ ова го изјави во Загреб по средбата со баварскиот премиер Маркус Содер, при што потсети дека Хрватска веќе ги завршила проектите поврзани со зголемувањето на капацитетот на ЛНГ терминалот и проширувањето на сопствената гасоводна мрежа.
„Сега ситуацијата е таква што треба да разговараме со словенечките и австриските колеги за да може гасот соодветно да се транспортира до Германија“, рече Пленковиќ.
Тој додаде дека Хрватска се надева оти тоа би можело да се реализира „во следните две години“.
Клучна инфраструктура во планот е ЛНГ терминалот на Крк, чиј капацитет во меѓувреме е зголемен на 6,1 милијарди кубни метри гас годишно. Според Пленковиќ, домашната потрошувачка на Хрватска достигнува најмногу околу 2,7 милијарди кубни метри годишно, што остава значителен дел од капацитетот достапен за извоз кон соседните пазари.
Сепак, за гасот од Крк да стигне до Германија потребно е да се обезбеди соодветен транзитен капацитет преку Словенија и Австрија. Токму ова е следниот чекор на кој Хрватска сака да работи со двете земји.
Идејата за директно поврзување на Крк со Баварија не е нова. Пленковиќ, Содер и тогашниот австриски канцелар Карл Нехамер во 2022 година го посетија терминалот во Омишал, а во 2023 година, заедно со тогашниот словенечки премиер, испратија писмо до Европската комисија со намера проектот за гасовод кон Баварија да се реализира со европска финансиска поддршка.
Баварскиот премиер Содер оцени дека Европската Унија треба да посвети поголемо внимание на енергетските приоритети и нагласи дека за неговата покраина е особено важно подобро поврзување со јужните енергетски коридори, имајќи предвид дека досега поголем акцент бил ставен на северните правци.
„Баварија е многу заинтересирана и ова мора да стане приоритетен проект“, рече Зедер, додавајќи дека за ова прашање ќе разговара и на ниво на Германија и Европската Унија.
Покрај природниот гас, планираниот коридор треба да биде подготвен и за транспорт на водород, посочија двајцата лидери.
За Хрватска, реализацијата на оваа врска би значела поголемо искористување на капацитетот на Крк и посилна улога во регионалното снабдување со гас, додека за Германија би отворила дополнителна рута за пристап до ЛНГ преку Јадранот и јужниот дел на Централна Европа.
Извор: Tportal.hr
