Најголемиот оперативен батериски систем за складирање електрична енергија во Европа започна со комерцијална работа во Шкотска, на локација каде што порано се наоѓал рудник за јаглен.
Системот Coalburn 1 има моќност од 500 мегавати и капацитет за складирање од 1.000 мегават-часови (1 GWh). Тоа значи дека при целосно наполнет систем, електрична енергија со моќност од 500 MW може да се испорачува околу два часа.
Проектот е развиен од данскиот инвестициски фонд Copenhagen Infrastructure Partners (CIP), а батериската опрема ја обезбеди e-Storage, дел од канадската компанија Canadian Solar.
Изградбата на Coalburn 1 започна во ноември 2023 година во Јужен Ланаркшир, во близина на Глазгов. Во април 2025 година CIP продаде половина од проектот на инвестициската компанија Axa IM Alts.
Ќе помага во балансирањето на електроенергетската мрежа
Батерискиот систем ќе овозможува складирање на електрична енергија кога производството е поголемо од потрошувачката, а нејзино враќање во мрежата во периоди на зголемена побарувачка.
Ова е особено важно за систем со сè поголем удел на ветерни и соларни електрани, чие производство зависи од временските услови.
Coalburn 1 има 10-годишен договор за оптимизација со компанијата SSE, како и 15-годишен договор во рамки на британскиот пазар на капацитети за 300 MW и дополнителен седумгодишен договор за 75 MW.
Со управувањето со системот ќе се занимава компанијата RES.
Од CIP оценуваат дека проектот ќе придонесе за поголема флексибилност и сигурност на британскиот електроенергетски систем, ќе овозможи полесно приклучување на нови обновливи извори и ќе помогне во намалувањето на трошоците за потрошувачите.
Дел од поголема мрежа на батериски системи
Coalburn 1 е првиот од три батериски системи со капацитет од по 1 GWh што CIP ги развива во Шкотска.
Во изградба се и Coalburn 2 и Devilla, кои, исто така, ќе бидат директно поврзани со преносната електроенергетска мрежа. Батериската технологија за сите три проекти ја обезбедува e-Storage.
CIP, заедно со локалниот партнер Alcemi, во Велика Британија развива пошироко портфолио од седум големи батериски системи, со вкупна моќност од 4,3 GW.
Пуштањето во работа на Coalburn 1 е значајно и од аспект на енергетската трансформација на Шкотска. Системот е изграден на поранешен рударски локалитет, кој наместо за производство на јаглен сега се користи за инфраструктура што треба да овозможи поголема употреба на чиста електрична енергија.
Развојот на ваквите системи станува сè поважен во Европа, каде брзото зголемување на производството од сонце и ветер создава потреба од дополнителни капацитети за складирање, балансирање и флексибилност на електроенергетските мрежи.
Извор: Pv-magazine.com
