Белград. 25 мај 2025 – Директорот на „Србијагас“, Душан Бајатовиќ, соопшти дека изминатиот петок бил потпишан анекс на постоечкиот договор за испорака на руски гас за Србија, со што се обезбедува континуирано снабдување и полнење на складиштата во „Банатски двор“ и во Унгарија пред почетокот на зимската сезона.
Според Бајатовиќ, анексот ги продолжува досегашните услови до 30 септември, обезбедувајќи испорака од шест милиони кубни метри гас дневно по цена од 290 евра за илјада кубни метри.
„Ова ни овозможува стабилно полнење на складиштата, со целосна подготвеност за претстојната зима“, изјави тој за Радио-телевизија Србија. Планот е да се достигне дневно ниво од осум милиони кубни метри, со дополнителни четири милиони како резерва. Сепак, Бајатовиќ посочи на логистички тешкотии во обезбедувањето на тие дополнителни количини, бидејќи „сите ги напаѓаат истите извори“. Додаде дека тие количини ќе бидат набавени по најповолна цена, но ќе биде неопходно учество на аукции. 
Во однос на шпекулациите во јавноста за потенцијални проблеми со снабдувањето, Бајатовиќ ги демантираше како неточни, нагласувајќи дека „сѐ е во ред и дека ќе има доволно гас за сите потреби“. „Со овој аранжман, цената на гасот за домаќинствата сигурно нема да се зголеми, а за индустриските потрошувачи може да се очекува и намалување“, изјави тој.
Во светло на новите санкции кои ги најавува Брисел и кои би можеле да го засегнат и рускиот гас, Унгарија веќе предупреди дека таквиот чекор би имал сериозни економски последици за повеќе европски земји.
„САД немаат капацитет да испорачаат доволно гас, а најголем проблем би бил доколку се прекинат сите финансиски текови. Повторно ќе нагласам – без рускиот гас, нема стабилно снабдување“, изјави Бајатовиќ за РТС.
Извор: РТС
