Светската продажба на електрични и plug-in хибридни возила во јануари 2026 година изнесуваше околу 1,2 милиони единици, што претставува пад од 6% на годишно ниво. Намалувањето главно се должи на укинувањето или намалувањето на државните субвенции во некои од најголемите пазари, како САД и Кина.
Продажбата на целосно електрични возила (BEV) е намалена за 4%, додека plug-in хибридите (PHEV) бележат пад од 8%. Сепак, доколку се исклучат Кина и САД од статистиката, глобалната продажба на електрични возила би пораснала за 36 проценти, што укажува на силен раст во други региони.
Во јануари електричните возила учествуваат со 18% во вкупниот светски автомобилски пазар, од кои 12% се целосно електрични модели. Силен раст е забележан на повеќе пазари во Азија, меѓу кои Индија, Индонезија, Малезија, Филипини, Сингапур и Јужна Кореја, но и во земји како Азербејџан, Белорусија, Полска и Уругвај.
Tesla Model Y најпродаван модел
На листата на најпродавани електрични модели и натаму води Tesla Model Y, со 53.074 продадени возила во јануари, иако продажбата е намалена за 7% во однос на истиот месец минатата година. Второто место го зазеде кинескиот Xiaomi YU7, додека трет е Geely Xingyuan, со речиси 31.000 регистрации.
Се очекува Model Y и годинава да ја задржи позицијата најпродаван електричен автомобил во светот.
За разлика од него, Tesla Model 3 бележи значителен пад – испораките се намалени за 47%, на помалку од 15.000 возила, што е најслаб резултат од 2020 година.
Подем на кинеските стартапи
Во првите десет најпродавани модели се појавуваат и неколку нови кинески производители. Меѓу нив се AITO M7, NIO ES8, Fang Cheng Bao Tai 7 и Li Auto i6, што покажува дека стартап компаниите сè повеќе го менуваат пазарниот баланс.
Во јануари дури пет модели од стартап компании се најдоа во горната половина на листата, додека една година претходно имаше само еден.
Пад кај големите брендови
Повеќето водечки производители бележат намалување на продажбата. BYD и Tesla имаат пад од 21% на годишно ниво, Wuling од 30%, а Geely од 12 проценти. Намалување има и кај Volkswagen (-14%) и BMW (-13%).
Спротивно на тоа, стартап компаниите бележат силен раст: AITO порасна за 82% благодарение на моделот M7, додека Xiaomi бележи раст од 70% поттикнат од успехот на YU7.
BYD и натаму водечки производител
Меѓу производителите на електрични возила, BYD го задржува првото место со 17,4% удел на пазарот, иако тоа е значително помалку од 23,6% една година претходно. Следува Geely со 10,5%.
Tesla, пак, падна од третото на петтото место по удел на пазарот, со околу 6%, зад Volkswagen Group и SAIC.
Аналитичарите оценуваат дека резултатите од јануари покажуваат дека глобалниот пазар на електрични возила влегува во нова фаза на засилена конкуренција, особено поради растечкиот извоз на кинеските производители.
Извор: Cleantechnica.com
