Водечката австриска енергетска и петрохемиска компанија OMV пријави значителен пад на добивката во четвртиот квартал од 2025 година, како резултат на пониските европски цени на природниот гас и послабата продажба.
Консолидираните приходи од тековни операции се намалија за 8% на годишно ниво, на 6 милијарди евра. Оперативниот резултат според методологијата CCS, која OMV ја користи како клучен показател за нето-приходот, падна за 222 милиони евра, на 1,2 милијарди евра.
Најголемиот пад е забележан во сегментот маркетинг на гас и енергија, каде што нето-резултатот се намали за 53%, на 586 милиони евра, поради пониска договорна продажба. Дел од загубите беа надоместени со подобри резултати во сегментите горива и хемикалии, CCS резултатот кај горивата се зголеми трипати, на 346 милиони евра, додека кај хемикалиите речиси се удвои, на 236 милиони евра.
Нето-добивката што им се припишува на акционерите на OMV во четвртиот квартал падна за 70%, на 90 милиони евра, а заработката по акција се намали на 0,28 евра, од 0,92 евра една година претходно. На годишно ниво, компанијата пријави пад на нето-добивката од 27%, на околу една милијарда евра.
Аналитичарите оценуваат дека OMV е меѓу европските компании најизложени на флуктуациите на цените на гасот. Според нив, зголемената понуда на ЛНГ врши притисок врз спот-цените во Европа, што може дополнително да ја погоди заработката на компанијата.
За 2026 година, OMV очекува вкупното производство на јаглеводороди да биде нешто под 300.000 барели нафтен еквивалент дневно, наспроти 305.000 во 2025 година, под услов да нема прекини во работењето во Либија. Компанијата најави и зголемување на трошоците за истражување и процена на речиси 200 милиони евра.
Воедно, OMV прогнозира значително влошување на маржите во рафинирањето на нафта, со очекување дека европскиот показател за рафинериски маржи ќе се стабилизира околу 8 долари по барел во 2026 година, во споредба со 10,1 долар по барел во 2025 година.
Извор: Upstreamonline.com
