Продажбата на електрични автомобили во Европа продолжува да расте, а европските влади во 2026 година воведуваат нови субвенции и даночни олеснувања за да го забрзаат преминот кон почист транспорт. Повисоките цени на горивата и нестабилноста на енергетските пазари дополнително го зголемуваат интересот за возила на струја.
Според Европската асоцијација на производители на автомобили (ACEA), батериските електрични возила учествувале со 17,4% од вкупниот пазар на Европската Унија во 2025 година, додека во првите два месеци од 2026 година нивниот удел пораснал на 18,8%.
Една од најголемите мерки ја најави Франција, која ќе ја зголеми државната поддршка за електрификација од 5,5 на 10 милијарди евра годишно до 2030 година. Планот предвидува нови субвенции за купување електрични автомобили, изградба на инфраструктура за полнење и цел две од три нови возила до крајот на деценијата да бидат електрични. Дополнително, ќе се воведе и програма за социјален лизинг за 100.000 возила наменети за граѓани со пониски приходи.
Највисоки директни субвенции за купување електричен автомобил нуди Италија, каде поддршката достигнува до 11.000 евра, зависно од приходите и условите за замена на старо возило. Во Кипар субвенцијата е до 9.000 евра, а за одредени категории граѓани може да достигне и до 20.000 евра. Словенија нуди до 7.200 евра, Малта од 6.000 до 8.000 евра, Германија до 6.000 евра, Франција до 5.700 евра, Шпанија до 4.500 евра, а Португалија до 4.000 евра.
Покрај директната финансиска помош, повеќе земји нудат и значајни даночни олеснувања. Најсилен систем има Норвешка, каде купувачите се ослободени од ДДВ и од данок при купување возило. Благодарение на тоа, дури 95,9% од сите новорегистрирани автомобили во земјата во 2025 година биле електрични.
Во рамки на Европската Унија, Бугарија, Кипар, Португалија, Грција и Унгарија имаат целосно ослободување од регистрациски и годишни давачки за електрични возила. Германија, пак, нуди и 10-годишно ослободување од данок на моторни возила, како и поддршка за поставување домашни полначи.
Од ACEA оценуваат дека достапната цена останува клучен фактор за масовно прифаќање на електричните автомобили. Според асоцијацијата, субвенциите ја намалуваат почетната бариера за купување и им овозможуваат на повеќе граѓани полесно да преминат кон чиста мобилност.
Извор: Acea.auto
