Американскиот производител на соларни панели „Фрст Солар“ поднесе тужба против кинеската „Џеј Еј Солар“ и компанијата „Американ Панел Солушнс“, која е во сопственост на „Корнинг“, обвинувајќи ги за повреда на американски патент поврзан со производство на високоефикасни соларни ќелии.
Тужбата е поднесена пред федералниот суд во Делавер и се однесува на технологијата TOPCon, односно технологија со пасивиран контакт преку тунелски оксид, која денес широко се користи во производството на соларни панели со кристален силициум.
„Фрст Солар“ тврди дека двете компании произведувале, увезувале и продавале соларни ќелии и модули со производни процеси опфатени со нејзиниот патент.
Патентите што се предмет на спорот „Фрст Солар“ ги стекнал по купувањето на компанијата „ТетраСан“ во 2013 година. „Џеј Еј Солар“, пак, била првичниот развивач на фабрика за соларни панели во Аризона, која во 2025 година ја презел „Корнинг“.
Тужбата е дел од пошироката правна кампања на „Фрст Солар“ против конкурентите во соларната индустрија. Компанијата минатиот месец најави дека ќе ја повлече постапката што ја водеше пред Комисијата за меѓународна трговија на САД (ITC) и наместо тоа ќе ги продолжи споровите преку федералните судови.
„Фрст Солар“ веќе води или подготвува постапки поврзани со компании и подружници на „Канадиан Солар“, „Џинко Солар“, „Т1 Енерџи“ и „Трина Солар“.
Американската компанија е специјализирана за производство на соларни панели со технологија на тенок слој од кадмиум-телурид, додека TOPCon е технологија која во последните години широко се применува кај производителите на соларни панели базирани на кристален силициум.
Од „Џеј Еј Солар“ и „Корнинг“ засега не одговориле на барањата за коментар на тужбата, објави „Ројтерс“.
Случајот доаѓа во поширок контекст на долгогодишни спорови меѓу западни и кинески компании околу интелектуалната сопственост и користењето на технологии. Американските власти и компании во повеќе наврати ја обвинуваат Кина за неовластено користење или трансфер на технологии, вклучително и преку спорови за патенти и деловни тајни. Сепак, во одделните случаи станува збор за различни правни постапки и обвиненија, па нивната основаност се утврдува во конкретните судски и регулаторни процеси.
Извор: Ројтерс
