Баку. 3 март 2026 – Во Баку денеска се одржа министерската средба на 12-тиот Советодавен совет за Јужниот гасен коридор и 4-тиот Советодавен совет за зелена енергија, со учество на претставниците на владите на 27 земји-членки на ЕУ и 60 институции и компании.
Средбата ја потврди стратешката енергетска соработка меѓу Европска Унија и Азербејџан, насочена кон сигурно и конкурентно снабдување со природен гас, развој на обновливи извори, енергетска ефикасност, производство на водород и намалување на емисиите на метан.
Во фокусот беше улогата на Јужниот гасен коридор како клучна инфраструктура за диверзификација на европското снабдување со гас. Според презентираните податоци, во 2025 година Азербејџан и државната компанија SOCAR испорачале 12,5 милијарди кубни метри природен гас до земјите членки на ЕУ, што е зголемување од 53,8% во споредба со 2021 година. Партнерите ја оценија оваа динамика како значаен придонес за зајакнување на европската енергетска безбедност.
Разгледани беа и тековните инвестиции во гасната инфраструктура, како и условите за дополнително зголемување на испораките во наредните години. Воедно беше истакната важноста на меѓународните иницијативи за намалување на емисиите на метан, меѓу кои Global Methane Pledge и Oil and Gas Methane Partnership 2.0.
Паралелно со министерските состаноци се одржа и инвестициска тркалезна маса за зелена поврзаност меѓу ЕУ и Азербејџан, со учество на меѓународни финансиски институции и европски компании. Главни теми беа регионалната електроенергетска поврзаност, инвестициите во обновливи извори и унапредувањето на енергетската ефикасност.
Според оценките на ИЕА и ИРЕНА, без забрзана електрификација и поголеми вложувања во мрежи и складирање, напредокот во обновливите извори нема да биде доволен за исполнување на климатските и безбедносните цели до 2030 година.
Министерот за енергетика на Азербејџан, Парвиз Шахбазов, изјави дека природниот гас останува клучен и флексибилен енергетски ресурс во услови на растечка побарувачка за електрична енергија, истакнувајќи ја стратешката важност на Јужниот гасен коридор. Тој најави продлабочување на соработката во развојот на прекурегионални зелени енергетски коридори што ќе го поврзат обновливиот потенцијал на Азербејџан и Централна Азија со европскиот пазар.
Еврокомесарот за енергија и домување, Дан Јоргенсен, порача дека партнерството со Азербејџан се развива паралелно со транзицијата кон чиста енергија во Европа, со засилена соработка од обезбедување гас до модернизација на мрежите и проширување на обновливите извори. Според него, регионот на Јужен Кавказ има потенцијал да стане центар за развој на чисти технологии и инфраструктура.
Извор: Европска комисија
