Прага. 5 Јуни 2025 – Чешката Република и јужнокорејската компанија KHNP потпишаа договор за изградба на два нови нуклеарни реактори во електраната „Дуковани“, откако судот ја отфрли тужбата на француската компанија EDF која се жалеше на транспарентноста на тендерот.
Чешкиот премиер Петр Фијала изјави дека потпишувањето на договорот претставува „основен чекор кон зголемена енергетска сигурност и самостојност“.
„Договорот за испорака на два блока за нуклеарната централа Дуковани е веќе потпишан“, рече Фијала. „Направивме сè што можеме за тој да се потпише веднаш штом правните пречки беа отстранети.“ 
Според договорот, KHNP ќе ги гради двата реактори за државната енергетска компанија ČEZ, а околу 60% од работите ќе бидат доделени на чешки компании. Секоја единица ќе чини приближно 200 милијарди чешки круни (околу 9 милијарди долари).
Претходно, регионалниот суд во градот Брно ја суспендираше одлуката за избор на KHNP, откако EDF поднесе жалба за неправилности во тендерската постапка. Но, вишиот суд пресуди дека жалбата има процедурални недостатоци и ја поништи одлуката за блокада, што овозможи финализирање на договорот.
Чешка, земја со 10,9 милиони жители и членка на ЕУ, моментално обезбедува околу 40% од својата електрична енергија преку нуклеарна енергија, најмногу од централите Дуковани и Темелин. Со изградбата на новите единици и планираните мали модуларни реактори до 2050 година, се очекува уделот на нуклеарната енергија да достигне 50%, во рамки на напорите за напуштање на фосилните горива.
Изградбата на новите блокови треба да започне во 2029 година, а првиот реактор се очекува да започне пробна работа во 2036 година.
Извор: AFP
