Американската нафтена компанија „Шеврон“ дополнително го зајакнува своето присуство во Грција, откако официјално поднесе барање за преземање на 70% од концесиските права за офшор блокот „10“ во Јонското Море, кој досега беше целосно во сопственост на грчката компанија „Хеленик Енерџи“.
Според соопштението на грчкото Министерство за енергетика, двете компании истовремено побарале и пренос на улогата оператор на блокот од „Хеленик Енерџи“ на „Шеврон“. Доколку трансакцијата биде одобрена од надлежните институции, американската компанија ќе контролира 70% од концесијата, додека грчката енергетска групација ќе задржи 30%.
Блокот „10“, кој се наоѓа во близина на Кипарискиот Залив во јужниот дел на Јонското Море, опфаќа површина од околу 2.400 квадратни километри. Во комбинација со останатите концесии јужно од Пелопонез, се создава единствена истражувачка зона од приближно 14.200 квадратни километри.
Станува збор за една од најзрелите истражувачки области во грчкото енергетско портфолио, бидејќи „Хеленик Енерџи“ уште од 2023 година има спроведено 2Д и 3Д сеизмички истражувања. Според информации од енергетскиот сектор, токму анализата на овие податоци била клучна причина за интересот на „Шеврон“ за блокот „10“, како и за соседниот блок „А2“, кој претставува геолошко продолжение на истата зона.
Во меѓувреме, грчките власти разгледуваат и барање за продолжување на втората истражувачка фаза за дополнителни 18 месеци, со цел компаниите заеднички да ги анализираат податоците од сеизмичките истражувања и резултатите од соседните концесии, пред да донесат одлука за премин во третата и последна фаза, истражно дупчење.
Овој потег е дел од пошироката стратегија на големите американски нафтени компании, кои во последниот период се насочуваат кон позрели и помалку ризични проекти со поголеми шанси за брза комерцијална експлоатација. Промените се поврзуваат и со отворањето на нови пазари под администрацијата на американскиот претседател Доналд Трамп.
Покрај „Шеврон“, и „ЕксонМобил“ неодамна го засили своето присуство во Грција со влез во „Блок 2“ во Јонското Море, додека се повлече од проектот западно од Крит. Аналитичарите оценуваат дека Јонското Море станува сè поатрактивна зона за меѓународните енергетски компании, на сметка на областите околу Крит, кои претходно беа во центарот на нивниот интерес.
Од Министерството за енергетика нагласуваат дека целата постапка ќе се спроведува согласно грчката регулатива и строгите еколошки и безбедносни стандарди за офшор истражување на јаглеводороди.
Извор: Ekathimerini.com
