Украинскиот претседател Володимир Зеленски потпиша закон со кој се предвидува целосна интеграција на енергетскиот пазар на Украина со внатрешниот пазар на Европската Унија.
Законот бр. 12087-д, кој неодамна беше усвоен од украинскиот парламент, воспоставува сеопфатна правна рамка за поврзување на украинскиот пазар на електрична енергија со европските енергетски системи.
Со новите одредби се овозможува усогласување на „ден однапред“ и „intraday“ пазарите со европските трговски зони, што значи координирано одредување на цените и количините на електрична енергија за следниот ден и во текот на истиот ден.
Законот исто така го воведува европскиот модел за подготвеност при ризици во енергетскиот сектор и воспоставува механизми за обезбедување доволен капацитет на електроенергетскиот систем.
Дополнително, се предвидуваат нови механизми за пофлексибилно управување со понудата и побарувачката, вклучувајќи и здружување на мали енергетски извори и подобро управување со потрошувачката на електрична енергија.
Овој чекор се смета за важен напредок во енергетската интеграција на Украина со Европската Унија, особено во контекст на постепеното приближување кон европскиот енергетски пазар. Претседателот Володимир Зеленски го потпиша законот откако тој беше усвоен од украинскиот парламент на 7 април.
Извор: Pravda.com.ua
