Во Општина Чаир денеска беше пуштена во употреба новата когенеративна централа на „ТЕССА Енерџи“, инвестиција која, според Владата, претставува нов производен капацитет со значење и за енергетската сигурност и за квалитетот на животната средина.
На свеченото пуштање во употреба присуствуваа премиерот Христијан Мицкоски, министерката за енергетика, рударство и минерални суровини Сања Божиновска и заменик-претседателот на Владата и министер за транспорт и врски Александар Николоски.
Мицкоски оцени дека станува збор за значајна приватна инвестиција во енергетиката, особено во пресрет на новата грејна сезона.
„Би сакал да ја искористам оваа прилика да му честитам на сопственикот на овој објект, којшто ќе биде наскоро, денеска пуштен во употреба. Приватна инвестиција во делот на енергетиката, когенеративна централа. Што значи когенеративна централа? Дека во исто време ќе произведува и топлина за затоплување на домовите на граѓаните, но истовремено ќе произведува и електрична енергија. Нешто што навистина претставува успешен проект, особено имајќи ги предвид предизвикувачките времиња коишто ни престојат оваа зима“, рече Мицкоски.
Премиерот посочи дека за време на посетата на објектот биле разгледани инсталираните гасни мотори, автоматиката и останатата опрема, како и плановите на инвеститорот за понатамошно проширување на инвестицијата.
Според него, ваквите проекти имаат значење и од аспект на намалувањето на влијанието врз животната средина.
„Јас му честитам, ова е во насока на подобрување исто така и на квалитетот на животната средина, намалување на емисиите на штетни честички во воздухот и јас убеден сум дека вакви проекти се само додадена вредност во квалитетот на животот на нашите граѓани. Уште еднаш му честитам. Ние како влада ќе продолжиме да поддржуваме вакви проекти и нека е аирлија и да ни се множат уште повеќе вакви проекти“, порача Мицкоски.
Министерката Божиновска порача дека значењето на новата централа го надминува рамките на самата инвестиција, бидејќи секој нов домашен енергетски капацитет придонесува кон поотпорен и постабилен систем.
„За нас како Министерство за енергетика, рударство и минерални суровини, секој нов капацитет има пошироко значење. Нашата цел е да изградиме енергетски систем кој ќе биде сигурен, стабилен, модерен и конкурентен – систем кој ќе може да одговори и на потребите на граѓаните и на растечките потреби на индустријата“, истакна Божиновска.
Таа нагласи дека енергетската сигурност не се сведува само на производството на електрична енергија, туку е директно поврзана со економската стабилност и конкурентноста на земјата.
„Енергетската сигурност е прашање на економска стабилност, конкурентност, инвестиции и квалитет на живот. Секој нов мегават домашно производство значи дополнителен капацитет и поголема отпорност на нашиот систем во услови на променливи цени и неизвесности на европските и светските енергетски пазари“, порача министерката.
Според Министерството, развојот на енергетскиот сектор треба да се темели на комбинација од нови производни капацитети, модернизација на мрежата и инфраструктурата, поголема енергетска ефикасност, обновливи извори и примена на современи технологии.
„Тоа е патот кон енергетски систем кој нема само да произведува повеќе енергија, туку ќе биде подобро управуван, поотпорен и подготвен за предизвиците што ги носи новото време“, нагласи Божиновска.
Таа порача дека државата има потреба од нови инвестиции во енергетиката, но и од јасни правила и предвидлива средина за нивна реализација.
„Енергетските инвестиции можат и мора да се реализираат ефикасно, одговорно и во согласност со утврдените правила и стандарди. Нашата задача како институција е да создадеме услови за развој, но истовремено да го чуваме јавниот интерес и да обезбедиме сигурен и стабилен енергетски систем за државата“, истакна Божиновска.
Новата когенеративна постројка е реализирана врз основа на Овластување за изградба на енергетски објект издадено од Министерството за енергетика, рударство и минерални суровини, по завршени технички прегледи и функционални испитувања.
Постројката има инсталирана моќност од 2,106 MW за производство на електрична енергија и 2,6 MW топлинска енергија. Инвестицијата е прва фаза од поширок план за развој и модернизација на поранешната Топлана Скопје Север во современ енергетски центар.
Божиновска посочи дека за Министерството е особено важно домашните инвеститори да имаат доверба и сигурност за вложување во енергетската иднина на земјата.
„Нашата порака е јасна – Македонија треба да продолжи да гради, да инвестира и да создава нови енергетски капацитети. Но секоја инвестиција треба да носи поширока вредност – за економијата, за локалната заедница и за иднината на државата“, порача министерката.
Енергетика 24
