Европа овој месец ќе ја надмине границата од 100 GW инсталиран капацитет за складирање енергија, покажува анализата на LCP Delta и Energy Storage Europe, претставена на конференцијата Enlit Europe во Виена. Во вкупните резултати се вклучени Европската унија, Обединетото Кралство, Норвешка и Швајцарија.
Според аналитичарите, оваа бројка е значајна бидејќи одговара на пик-потрошувачката на електрична енергија во Германија и Холандија. До 2030 година се очекува капацитетите за складирање во регионот да пораснат за дополнителни 115%, што ја нагласува клучната улога на складирањето во интеграцијата на обновливите извори во мрежата.
Најголем дел од капацитетот и понатаму го држат пумпните хидроцентрали со 50,6 GW, кои годинава се зголемени за уште 500 MW во Белгија и Австрија. Сепак, батериските системи растат најбрзо и до 2025 година ќе надминат 4 GW нови големи проекти. Доколку трендот продолжи, батериите до крајот на деценијата ќе ја надминат пумпната хидроакумулација и ќе станат водечка технологија за складирање во Европа.
Развојот е различен по сегменти. Најбрзо напредуваат големите системи за складирање, кои овозможуваат балансирање на мрежата и искористување на вишоците од обновливи извори. Комерцијалниот и индустрискиот сектор стабилно расте со цел намалување на трошоците и зголемување на енергетската независност. Пазарот на домашни батерии, кој порасна поради субвенциите во 2022–2023 година, моментално се стабилизира, но се очекува повторно забрзување по 2027 година, поттикнато од растот на соларната енергија, електрификацијата и динамичните тарифни модели.
Според прогнозите, до 2030 година Европа ќе надмине 215 GW капацитет за складирање од сите технологии, од кои повеќе од 160 GW ќе бидат батериски системи. Годишните инсталации до крајот на деценијата ќе достигнат 20–25 GW, што е повеќе од дваесеткратно зголемување во однос на почетокот на 2020-тите – тренд што ќе бара нови регулативи, пазарни механизми и инвестиции.
Извор: LCP.com
