Париз. 18 октомври 2025 – Приходите на Русија од извоз на сурова нафта и нафтени деривати повторно опаднаа во септември, достигнувајќи 13,35 милијарди долари, покажува најновиот извештај на Меѓународната агенција за енергија (ИЕА). Станува збор за пад во однос на августовските 13,58 милијарди долари, што се должи на пониски цени и намалени извози на нафтени производи.
ИЕА наведува дека руската енергетска индустрија се соочува со сериозни притисоци поради засилените украински напади со дронови врз рафинерии и нафтоводи, како и поради западните санкции. Според агенцијата, нападите предизвикале намалување на дневниот капацитет за преработка на сурова нафта за околу 500.000 барели, што резултирало со недостиг на гориво на домашниот пазар и со пад на извозот на производи.
Иако извозот на сурова нафта се зголемил за 370.000 барели дневно, достигнувајќи 5,1 милион барели, највисоко ниво од мај 2023 година – извозот на нафтени деривати паднал на 2,4 милиони барели дневно, што е најниско ниво од април 2020 година. Најголемо намалување е забележано кај извозот на гасно масло и мазут, особено кон Саудиска Арабија.
Зголемувањето на приходите од извоз на сурова нафта за околу 200 милиони долари било целосно надоместено со пад од 440 милиони долари кај нафтените производи.
Според извештајот, попустот на руската нафта „Уралс“ во однос на северноморскиот бенчмарк надминал 13 долари за барел на почетокот на октомври – најголема разлика од мај наваму, поради зголемената понуда на глобалниот пазар.
Производството на руска сурова нафта во септември пораснало на 9,21 милион барели дневно, во споредба со 9,03 милиони во август, но и понатаму останува под квотата на ОПЕК+ од 9,415 милиони барели.
Во истиот извештај се наведува дека Казахстан забележал благо намалување на производството на нафта – на 1,84 милиони барели дневно, поради прекини во извозот преку Каспискиот нафтовод, кој учествува со околу 80% од извозот на земјата.
Извор: Ројтерс
