Хјустон. 30 август 2025 – Глобалната побарувачка за природен гас ќе порасне за повеќе од 20% до 2050 година во однос на лани, предвидува „Ексон Мобил“ во својата годишна прогноза. Гасот сè повеќе ќе го потиснува јагленот во индустриското производство и ќе го поддржува растот на потрошувачката на електрична енергија во земјите во развој.
Американскиот енергетски гигант, кој во наредните пет години планира зголемување на производството за 18%, ги заснова своите долгорочни инвестиции врз овие проекции. Според проценките, глобалната побарувачка за нафта ќе се стабилизира по 2030 година, но ќе остане над 100 милиони барели дневно сè до средината на векот.
Нафтата и гасот и понатаму ќе имаат доминантна улога во енергетскиот микс, обезбедувајќи 55% од светската потрошувачка до 2050 година – за еден процентен поен помалку од сегашното ниво. Индустријата ќе биде главниот двигател на зголемената побарувачка за гас, бидејќи тој претставува почиста алтернатива на јагленот.
„Природниот гас е ефикасен начин да се обезбеди неопходната индустриска енергија и истовремено да се намали дел од емисијата што ја предизвикува јагленот,“ изјави директорот за економија и стратегиско планирање во „Ексон“, Крис Бердсол.
Компанијата предвидува дека побарувачката за бензин ќе опадне за една четвртина поради ширењето на електричните возила, додека дизелот и авио-горивата ќе останат клучни за транспортот и авиониката.
Иако глобалните емисии на јаглерод диоксид до 2050 година би можеле да се намалат на 27 милијарди тони – околу 25% помалку од денес – „Ексон“ предупредува дека тоа е далеку од целите на Обединетите нации. Компанијата повикува на јавни политики кои ќе овозможат поевтини технологии, без да предизвикаат ценовни шокови или проблеми во снабдувањето со енергија.
Извор: Ројтерс
