Белград. 26 август 2025 – Директорот на „Србијагас“, Душан Бајатовиќ, изјави дека очекува ново одлагање на американските санкции кон Нафтна индустрија Србије (НИС), нагласувајќи дека политичкиот дијалог е клучен за решавањето на прашањето.
Бајатовиќ во интервју за РТС изјави дека санкциите најверојатно ќе бидат пролонгирани уште еден или два месеца, додавајќи дека тие лесно се воведуваат, но тешко се укинуваат. Како најголема надеж ја посочи соработката меѓу САД, ЕУ и Русија, бидејќи, според него, Европа без Русија не може да ги исполни своите енергетски обврски.
Тој истакна дека НИС работи нормално, гориво има доволно, а државата има изработени планови за стабилно снабдување. „Не постои ризик од ценовни удари, недостиг или неможност за набавка на гориво“, рече Бајатовиќ.
Во врска со можното долгорочно решение за проблемот, Бајатовиќ откри дека НИС веќе понудил промени во управувањето на компанијата, без промена на сопственичката структура, што би можело да биде чекор кон целосно укинување на санкциите.
Покрај ова, тој нагласи и дека Србија подготвува нов тригодишен гасен аранжман со Русија, со пофлексибилни услови и поволна цена. Според договорот, Србија ќе располага со околу 2,5 милијарди кубни метри гас, при што цената ќе биде значително пониска од онаа на европските берзи.
„Аранжманот ќе биде поповолен од пазарните услови и ќе овозможи и дополнителни количини гас по договорени цени,“ рече Бајатовиќ.
Извор: РТС
