Берлин. 07 Мај 2025 — Новата германска министерка за економија и енергетика, Катарина Рајхе, во своето прво обраќање по преземањето на функцијата од Роберт Хабек од Зелените, повика на поголем реализам во енергетската политика на Германија и на подобро усогласување на обновливите извори со електроенергетската мрежа.
„Потребна ни е проверка на реалноста во енергетската политика,“ изјави Рајхе на свечената церемонија на примопредавање на должноста, нагласувајќи дека иако експанзијата на обновливите извори е „несомнена успешна приказна“, потребно е подобро да се управува со нејзините трошоци и ризици. Според неа, високите цени на електричната енергија претставуваат товар за економијата, и затоа е неопходно да се стабилизираат или намалат, преку реформи на тарифите за пренос и воведување на резервни електрани.
Рајхе особено се осврна на неодамнешниот голем прекин на струја на Иберискиот Полуостров, оценувајќи го како предупредување за потенцијалната ранливост на енергетските системи. „Проширувањето на ветерната и соларната енергија напредува, но системските ризици и трошоците беа потценети,“ рече таа. 
До летната пауза, новата влада ќе спроведе сеопфатна ревизија на побарувачката за електрична енергија и ќе ги преиспита клучните точки на енергетската транзиција, согласно коалицискиот договор меѓу конзервативците и социјалдемократите.
Во делот за природен гас, Рајхе најави поддршка за индустријата да склучува долгорочни договори за набавка на гас и повтори дека Германија мора да го диверзифицира снабдувањето. „Обновливите извори не можат сами да обезбедат сигурно и достапно снабдување за една индустриска нација како Германија,“ предупреди министерката, најавувајќи брз почеток на тендерите за изградба на до 20 GW гасни електрани.
Иако Германија не увезува директно руски LNG, Рајхе истакна дека дел од руското гориво преку терминалите во Холандија и Белгија веројатно завршува на германскиот пазар. Според податоците на S&P Global Commodity Insights, 91% од вкупниот германски увоз на LNG во 2025 година доаѓа од САД, што ја прави Америка доминантен снабдувач. Компании како EnBW, SEFE и Uniper веќе имаат долгорочни договори со американски производители, вклучувајќи ги Venture Global и Woodside.
Извор: Spglobal.com
