Бензините од 3 ноември поскапуваат за 2 денари за литар, дизелот за 1 денар, додека цената на екстралесното масло останува непроменета, одлучи Регулаторната комисија за енергетика (РКЕ). Мазутот поскапува за 1,30 денари за килограм. Со новата одлука, малопродажните цени на нафтените деривати во просек се зголемуваат за 1,55% во однос на одлуката од 26 октомври.
Новите максимални цени ќе важат од 3 ноември од 00:01 часот.
| Нафтен дериват | Нова цена | Промена |
|---|---|---|
| Еуросупер БС-95 | 93,00 ден/литар | +2,00 денари |
| Еуросупер БС-98 | 95,00 ден/литар | +2,00 денари |
| Еуродизел БС | 100,00 ден/литар | +1,00 денар |
| Екстра лесно масло (ЕЛ-1) | 110,00 ден/литар | без промена |
| Мазут М-1 НС | 55,573 ден/кг | +1,300 денари |
Според образложението на РКЕ, референтните цени на нафтените деривати на светскиот пазар бележат различни движења во однос на претходната пресметка. Кај бензините е забележано просечно намалување од 0,793%, а кај екстралесното масло од 0,695%. Од друга страна, референтната цена на дизелот е зголемена за 0,409%, додека кај мазутот растот изнесува 2,546%.
Дополнително, курсот на денарот во однос на американскиот долар, по кој се формирани цените во претходната пресметка, е повисок за 0,4400%.
Во пресметката се применети и владините мерки за намалување на даночното и акцизното оптоварување. За дизелот останува примената на намалената стапка на ДДВ од 10%, додека акцизата е намалена за 2 денари за литар кај бензините и за 4 денари за литар кај дизелот.
Од РКЕ посочуваат дека утврдените цени се максимални, што значи дека трговците на големо и мало можат да ги продаваат нафтените деривати и по цени пониски од утврдените.
Извор: РКЕ
