И покрај забавувањето на глобалниот автомобилски пазар и економската неизвесност, продажбата на електрични автомобили продолжува да расте и во 2026 година, покажува најновиот извештај на Меѓународната агенција за енергија (ИЕА) „Electric Car Markets in a Time of Uncertainty“.
Според анализата, глобалната продажба на автомобили во првата половина од годинава е намалена за околу 5% на годишно ниво, главно поради падот на побарувачката во Кина и САД. Сепак, електричните возила покажуваат значително поголема отпорност. Во вториот квартал продажбата на електрични автомобили пораснала за 4% во однос на истиот период лани и за дури 35% во споредба со првиот квартал од годинава.
Меѓународната агенција за енергија очекува до крајот на 2026 година електричните автомобили да достигнат удел од 29% од вкупната светска продажба на нови возила, што претставува околу 23 милиони продадени електрични автомобили. Тоа е подобра прогноза од онаа објавена во мај, благодарение на силниот раст во Европа, Латинска Америка, Индија, Австралија и Нов Зеланд.
Европа е најбрзорастечкиот пазар
Најголемото изненадување доаѓа од Европа, каде продажбата на електрични автомобили во првата половина од годината е зголемена за 30% во однос на истиот период лани. Германија, Обединетото Кралство, Франција, Италија и Шпанија бележат најголем апсолутен раст на новорегистрирани електрични возила.
Во Европската Унија електричните автомобили веќе сочинуваат повеќе од 30% од сите новопродадени автомобили, додека во Велика Британија нивниот удел достигнал 38%.
Кина останува лидер, но со нов предизвик
Иако Кина останува најголемиот светски пазар за електрични автомобили, домашната продажба е под притисок поради слабеењето на економијата и намалените државни субвенции.
Вкупната продажба на автомобили во Кина паднала за повеќе од 20% во првата половина од годината, но производителите го компензираат тој пад со агресивен извоз. Извозот на автомобили од Кина пораснал за 65%, а извозот на електрични автомобили за повеќе од 120% во споредба со истиот период лани. Денес речиси половина од кинескиот автомобилски извоз се електрични возила.
Истовремено, ИЕА предупредува дека повеќе од еден милион електрични автомобили извезени од Кина во последните 18 месеци сè уште не се регистрирани како продадени на странските пазари, што отвора прашања за акумулирани залихи и можен ценовен притисок во наредниот период.
Енергетската криза ја забрза електрификацијата
IEA оценува дека енергетската криза во 2026 година повторно ја ставила електрификацијата на транспортот во центарот на енергетската политика. Поради високите цени на горивата и ризиците за снабдувањето со нафта, голем број влади воведоа даночни олеснувања, субвенции, програми за замена на стари возила и инвестиции во инфраструктура за полнење електрични автомобили.
Конкуренцијата се сели кон батериите и софтверот
Извештајот предупредува дека глобалната автомобилска индустрија влегува во период на длабока трансформација. Вредноста сè повеќе се префрла од традиционалните механички компоненти кон батерии, електроника и софтвер, додека кинеските производители имаат значителна предност благодарение на интегрираните синџири на снабдување и производствени трошоци кои се околу 35% пониски од оние во развиените економии.
Според ИЕА, идната конкурентност на автомобилската индустрија ќе зависи од способноста на земјите да инвестираат во производство на батерии, иновации, дигитализација и стратешки партнерства, бидејќи електрификацијата станува главниот двигател на глобалниот автомобилски пазар.
Извор: IEA.org
