Британскиот енергетски гигант Shell во вториот квартал од годинава оствари приспособена нето добивка од 9,84 милијарди долари, повеќе од двојно повисока во споредба со истиот период лани и над очекувањата на аналитичарите, благодарение на повисоките цени на нафтата и природниот гас, како и на зголемената нестабилност на енергетските пазари за време на конфликтот меѓу Иран и Израел.
Компанијата соопшти дека резултатот е значително подобар од консензус-прогнозата на аналитичарите, кои очекуваа добивка од 8,92 милијарди долари. Во истиот квартал минатата година Shell оствари добивка од 4,26 милијарди долари.
Според компанијата, растот на добивката е поддржан од повисоките цени на енергенсите, силните резултати од тргувањето со течен природен гас (ЛНГ) и сурова нафта, како и од подобрените маржи во хемиската индустрија. Дел од позитивниот ефект бил неутрализиран од намаленото производство поради прекините во работењето на постројките во Катар.
Конфликтот на Блискиот Исток предизвика значителни турбуленции на глобалните енергетски пазари, што им овозможи на големите интегрирани компании како Shell, BP и TotalEnergies да остварат повисоки приходи од своите трговски операции.
Во текот на кварталот, рафинериите на Shell работеле со искористеност од 102% од номиналниот капацитет за да одговорат на зголемената побарувачка и високите цени на горивата. Како резултат на тоа, производството на авионско гориво е зголемено за околу 20% во однос на истиот период минатата година.
Остварената добивка е втора највисока квартална добивка во историјата на компанијата, веднаш зад рекордот поставен во вториот квартал од 2022 година, кога руската инвазија врз Украина предизвика историски ценовен шок на светските енергетски пазари. Shell истовремено пријави и највисок оперативен готовински тек од 2022 година наваму.
И покрај силните финансиски резултати, компанијата најави дека ќе ја задржи програмата за откуп на сопствени акции во вредност од 3 милијарди долари и во следните три месеци.
Особено силен придонес кон резултатите даде сегментот за интегриран природен гас, кој ја вклучува и најголемата светска платформа за тргување со ЛНГ. Овој бизнис оствари добивка од 2,7 милијарди долари, што претставува раст од 55% на годишно ниво, иако производството на природен гас се намали за 31% во однос на претходниот квартал.
Значително подобрување е забележано и во секторот за хемикалии и нафтени производи, каде добивката достигна 2,9 милијарди долари, во споредба со само 118 милиони долари во истиот период лани.
За третиот квартал Shell очекува благо намалување на производството на интегриран природен гас и ЛНГ, како и поголем обем на редовни ремонти во производствените и рафинериските капацитети.
Воедно, компанијата потврди дека постројката Pearl GTL во Катар, која беше оштетена при напад во март, сè уште не работи со полн капацитет. Поправките се очекува да траат околу една година, додека намаленото производство привремено се надоместува со дополнителни количини од Канада, Нигерија и Австралија.
Извор: Ројтерс
