Луксембург е светски лидер во чиста енергија, Франција и Белгија веднаш зад него

Сè поголем број држави успешно ја забрзуваат енергетската транзиција, а најновите податоци покажуваат дека во дел од Европа повеќе од две третини од произведената електрична енергија доаѓа од извори без емисии на јаглерод.

Според анализата на „Climate Crisis 247“, изработена врз основа на податоци од Американската администрација за енергетски информации (EIA), Луксембург е земјата со најголем удел на чиста електрична енергија во светот. Во 2024 година дури 89,1% од вкупното производство на електрична енергија во земјата потекнува од извори без емисии, пред сè од соларна енергија и други обновливи технологии.

На второто место се наоѓа Франција, каде 80,4% од електричната енергија се произведуваат од чисти извори. Клучен двигател на францускиот енергетски систем остануваат нуклеарните електрани, кои обезбедуваат повеќе од две третини од домашното производство на електрична енергија.

Трета е Белгија со удел од 72,2% , додека во првите пет се и Литванија (71,8%) и Данска (70,8%). Данска е единствената меѓу водечките земји каде ветерната енергија е доминантен извор, обезбедувајќи речиси 60% од вкупното производство на електрична енергија.

Во првите десет се најдоа и Унгарија, Словачка, Финска, Бугарија и Украина, каде чистата енергија учествува со повеќе од 58% во националното производство на електрична енергија. Во повеќето од овие држави најголемиот удел има нуклеарната енергија.

Истражувањето покажува дека глобалниот премин кон чиста енергија постепено се забрзува. Пред една деценија околу 14,7% од светското производство на електрична енергија доаѓало од извори без емисии, додека денес тој удел достигнува речиси 24%.

Научната заедница смета дека токму забрзаното користење на обновливите извори и нуклеарната енергија е еден од клучните предуслови за намалување на емисиите на стакленички гасови и справување со климатските промени.

Топ 10 земји според уделот на чистата електрична енергија во 2024 година:

Извор: Climatecrisis247.com