Иако изгледа безопасно, оставањето на полначот вклучен во штекер без поврзан уред може да има финансиски и безбедносни последици, предупредуваат експерти.
И кога не полни телефон или друг уред, полначот продолжува да троши мала количина електрична енергија. Потрошувачката е минимална, но ако во домаќинството постојано се вклучени повеќе полначи – особено за лаптопи или електрични велосипеди, т.н. „тивка“ потрошувачка со текот на времето може да ја зголеми сметката за струја.
Иако месечниот износ најчесто е незабележлив, на годишно ниво и во домови со повеќе уреди, трошокот може да стане значаен.
Покрај финансискиот аспект, постои и безбедносен ризик. Постојаното приклучување предизвикува постепено абење на електронските компоненти, што може да доведе до прегревање, појава на необични звуци или видливи оштетувања како промена на бојата и пукнатини. Во екстремни случаи, оштетен полнач оставен во штекер може да предизвика и пожар.
Современите полначи имаат вградени заштитни механизми што автоматски го прекинуваат протокот на струја кога батеријата е целосно наполнета или кога нема поврзан уред. Ова значително ја намалува непотребната потрошувачка и го зголемува нивото на безбедност.
Сепак, експертите препорачуваат едноставна навика, исклучување на полначите кога не се користат – како најсигурен начин за заштеда на електрична енергија и намалување на ризиците во домот.
Енергетика 24
