Киел / Уетерзен, Германија — Може ли еден мал град во северна Германија да стане модел за енергетски одржлив јавен превоз? Одговорот го дава проектот EMOSYN, кој по речиси четири години истражувачки труд постави нови стандарди за електрификација на автобускиот транспорт.
Во рамки на проектот, реализиран од Универзитетот за применети науки во Киел и Транспортната компанија на округот Пинеберг (KViP), беше развиен иновативен енергетски систем за полнење електрични автобуси – со соларна енергија, батерии и паметно управување со ресурсите.
На административната зграда и работилницата на депото во Уетерзен е инсталирана фотонапонска централа со моќност од 100 kW, а батериски систем од 328 kWh е сместен во специјален контејнер на самата локација. Сето тоа овозможува полнење на автобусите преку две станици – едната од 50 kW директно поврзана со батерискиот систем, а втората активирана во втората половина на 2024 година. 
„Технички и логистички ова беше голем предизвик, но успеавме да развиеме модел кој е и прецизен и применлив,“ вели проф. Клаус Леберт, раководител на проектот. „Овој систем значително ја намалува зависноста од мрежната струја и го отвора патот кон поголема енергетска самостојност.“
Проектот беше финансиски поддржан од германското Министерство за транспорт и дигитална инфраструктура со околу 312.000 евра, од кои речиси половина беа наменети за академската истражувачка компонента.
Според директорот на KViP, Томас Бекер, проектот не завршува тука. „Наученото од EMOSYN ќе биде основа за следниот чекор, воведување на уште 27 електрични автобуси и инсталација на ист број нови полначи. Веќе користиме пет полначки од 120 kW, а наскоро нашата мрежа ќе биде значително проширена.“
Проектот EMOSYN, чие име значи „електромобилност, паметна мрежа и самостојно производство на енергија“ е пример за тоа како научно засновани, технолошки решенија, поддржани од јавни фондови, можат да ја креираат иднината на одржливиот јавен превоз.
Извор: energetika-net.com
