Обновливите извори на енергија достигнаа 62,8% од вкупниот инсталиран електроенергетски капацитет на Турција до крајот на јули, покажуваат податоците на турското Министерство за енергетика и природни ресурси.
Вкупниот инсталиран капацитет на земјата достигна 126.476 MW, од кои 79.433 MW отпаѓаат на обновливи извори. Домашните извори на енергија учествуваат со 71,9% во вкупниот капацитет.
Најбрзо расте соларната енергија. Турција на крајот на јули имала 27.507 MW соларни капацитети, што претставува 21,7% од вкупниот инсталиран капацитет.
Ветерните електрани достигнале 15.358 MW, односно 12,1% од вкупниот капацитет.
Заедно, соларните и ветерните централи имаат 42.865 MW, или 33,8% од вкупниот електроенергетски капацитет на Турција.
Хидроенергијата и понатаму е најголемиот поединечен извор на електроенергија, со 32.344 MW, што претставува 25,6% од капацитетот.
Од необновливите извори, природниот гас има инсталиран капацитет од 25.013 MW, со удел од 19,9%. Домашниот јаглен учествува со 11.565 MW, односно 9,1%, додека капацитетот на електраните на увозен јаглен изнесува 10.466 MW, или 8,3%.
Биомасата има капацитет од 2.425 MW, додека геотермалната енергија учествува со 1.798 MW.
Турција цели кон енергетска независност
Турскиот министер за енергетика и природни ресурси Алпарслан Бајрактар изјави дека земјата продолжува да ги зголемува енергетските капацитети во насока на „посилна, понезависна и попросперитетна Турција“.
Тој повторно ја истакна целта на Анкара за постигнување целосна енергетска независност, при што посочи дека 42.865 MW соларни и ветерни капацитети се доказ за силната определба на Турција кон енергетската транзиција.
Растот на соларните и ветерните капацитети ја позиционира Турција меѓу најголемите пазари за обновлива енергија во регионот, додека истовремено земјата се обидува да ја намали зависноста од увозните енергенси.
Извор: Aa.com.tr
