Белград. 30 август 2025 – Од 1 октомври цената на електричната енергија за домаќинствата и малите потрошувачи во Србија ќе се зголеми во просек за 6,6%. Дополнително зголемување до 1,9% ќе имаат оние што трошат повеќе од 1.200 киловат-часови месечно, соопшти Агенцијата за енергетика на Република Србија (АЕРС).
Поскапувањето следува по барање на „Електропривреда Србије“ (ЕПС), а како главна причина се наведува растот на надоместоците за пренос и дистрибуција на електричната енергија. Минатата недела АЕРС одобри зголемување на цената за пристап до преносниот систем за 10% и на трошоците за дистрибуција за 16%. Тоа е прво покачување на цените по октомври 2021 година.
Паралелно со тоа, се воведува нова граница за зоните на потрошувачка: наместо досегашните 1.600 kWh, „црвената зона“ сега почнува од 1.200 kWh. Тоа значи дека секој киловат-час над оваа граница ќе се наплаќа двојно поскапо. „Сината зона“ ќе опфаќа потрошувачка од 350 до 1.200 kWh, додека „зелената зона“ останува до 350 kWh.
Според АЕРС, оваа промена ќе погоди релативно мал број домаќинства – околу 1% во летните месеци, 3% во преодниот период и околу 7% за време на зимата, кога потрошувачката е највисока. Сепак, и покрај покачувањето, цената на струјата за регулирано снабдување во Србија, без даноци и такси, останува меѓу најниските во Европа.
Овие мерки се дел и од обврските што српските власти ги презедоа кон Меѓународниот монетарен фонд (ММФ), каде што беше ветено зголемување на цената на електричната енергија од околу 7% и намалување на прагот за влез во „црвената зона“.
Покрај новите тарифи за граѓаните, „Електропривреда Србије“ најави олеснувања за претприемачите и за малите и микро фирмите. Од октомври тие ќе можат да склучуваат договори за снабдување по регулирани цени, исто како домаќинствата. На овој начин дел од бизнис-секторот ќе има можност да ги намали трошоците за електрична енергија и да избере дали ќе се снабдува по регулирани или по комерцијални цени.
Извор: Euronews.rs
