Токио/Подгорица. 3 јуни 2025 – Премиерот на Црна Гора, Милојко Спајиќ, за време на својата работна посета на Јапонија, објави дека најголемиот трговец со гас во таа земја, компанијата JERA, изразила интерес за инвестирање во црногорскиот енергетски сектор.
JERA, која е ќерка-компанија на двете најголеми јапонски енергетски корпорации, управува со една од најголемите и еколошки најприфатливи електрани во светот – Футсу (Futtsu), со капацитет од 5,16 GW распределени во 21 блок. Оваа електрана произведува пет пати повеќе енергија од целокупните годишни потреби на Црна Гора.
За време на посетата на Јапонија, премиерот Спајиќ се сретна со Јукио Кани, извршен директор на JERA, со кого разговараше за можностите за искористување на црногорските енергетски потенцијали. На средбата беше нагласено дека енергетиката претставува клучна развојна шанса за земјата. 
„Енергетиката е наша развојна шанса. Затоа е од суштинско значење проектите да се реализираат со кредибилни партнери што ќе придонесат за одржлив, пристапен и стабилен енергетски систем“, истакна Спајиќ.
Претставниците на JERA ја истакнаа својата подготвеност да го прошират делувањето и во Црна Гора, предлог што вклучуваше формирање на заеднички тим што ќе ја процени соработката и ќе дефинира можни насоки на партнерство. Во овој контекст, Кани ги сподели глобалните искуства на компанијата во енергетското поврзување, укажувајќи на важноста на стабилноста и енергетската безбедност на регионално и глобално ниво.
На состанокот било оценето дека Црна Гора има потенцијал да стане лидер во производството на зелена енергија и договорено продолжување на разговорите со Министерството за енергетика и рударство на Црна Гора со цел да се разработат модели за потенцијална инвестиција и интеграција на JERA во црногорскиот енергетски систем.
Извор: Bankar.me
