Министрите за енергетика на земјите членки на Европската Унија разговараат за можноста за воведување нов данок на екстрапрофитот на енергетските компании, остварен по растот на цените предизвикан од воениот конфликт со Иран.
Ова го изјави грчкиот министер за енергетика Ставрос Папаставру пред состанокот на европските министри за енергетика што треба да се одржи денес во Никозија.
Според него, во рамки на ЕУ веќе се водат разговори за механизам со кој дел од неочекувано високите приходи на енергетските компании би се пренасочиле кон ублажување на последиците од енергетската криза и растот на цените за граѓаните и индустријата.
Шпанската министерка за енергетика Сара Агесен изјави дека најмалку пет земји-членки, меѓу кои и Шпанија, ја поддржуваат иницијативата за воведување ваков данок.
Идејата за оданочување на екстрапрофитот повторно добива актуелност во време на зголемени геополитички тензии и нов раст на цените на енергенсите на европските пазари. ЕУ и претходно воведуваше привремени мерки за оданочување на вонредните приходи на енергетските компании по енергетската криза предизвикана од војната во Украина.
Се очекува темата да биде една од клучните на состанокот на министрите за енергетика на ЕУ во Никозија.
Извор: Ројтерс
