Пазарот на електрични автомобили во Европската Унија продолжува да бележи силен раст, при што во мај годинава трет последователен месец беа регистрирани повеќе од 200.000 нови електрични возила.
Според податоците на Европската асоцијација на производители на автомобили (ACEA), во мај во земјите на ЕУ биле регистрирани 203.417 нови патнички автомобили на батериски погон, што претставува раст од 42,9% во споредба со истиот месец минатата година. Ова е слично на резултатот од април, кога беа продадени 200.117 електрични возила, додека рекордот годинава останува март со 234.532 регистрации.
Во исто време, вкупниот автомобилски пазар во Европската Унија пораснал за значително поскромни 3,2% на годишно ниво, што дополнително ја нагласува динамиката на електричната мобилност.
Во првите пет месеци од 2026 година во ЕУ се регистрирани вкупно 950.521 нов батериски електричен автомобил, со што нивниот удел на пазарот достигна 20%. Со оглед на сегашното темпо на продажба, се очекува бројката од еден милион продадени електрични возила да биде надмината уште во текот на јуни.
Најголем раст на продажбата на електрични автомобили од почетокот на годината е забележан во Италија, каде регистрациите се зголемиле за 75,7%. Следуваат Франција со раст од 55,4% и Германија со 40,9%. Од друга страна, Белгија бележи умерен раст од 2,8%, додека Холандија е единствениот поголем пазар каде е регистриран пад од 9,7%.
Податоците покажуваат и значајни промени во структурата на европскиот автомобилски пазар. Хибридните возила остануваат најпродаван сегмент со удел од 37,8% во мај, додека бензинските автомобили учествуваат со 22,4%. Електричните автомобили веќе се веднаш зад нив со пазарен удел од 20%. Следуваат приклучните хибриди со 9,7% и дизел возилата со 7,6%.
Трендот укажува на континуирано слабеење на позициите на возилата со мотори со внатрешно согорување. Нивниот комбиниран пазарен удел во Европската Унија за само една година се намалил од 38% на 30,1%, додека електрифицираните возила сè повеќе доминираат на европските патишта.
Посебно внимание привлекува и враќањето на американскиот производител на електрични возила Tesla, кој во мај учествувал со околу 8% од вкупната продажба на електрични автомобили во Европската Унија.
Извор: Acea.auto
