Брисел / Лондон, 21 мај 2025 — Европската унија и Обединетото Кралство постигнаа политички договор за проширување на соработката во областа на енергетиката, прв ваков чекор по Брегзит. Двете страни истакнаа дека ги поврзуваат заедничките климатски цели и потребата од достапна и сигурна енергија.
Електроенергетските мрежи на ЕУ и Велика Британија се сè повеќе интегрирани, со над 10 GW интерконекции кои ги поврзуваат двете страни, а нови врски се веќе во подготовка. Тие, исто така, споделуваат заедничка визија и амбиција Северното Море да се развие во централeн јазoл на чиста енергија за цела Европа. Овој договор претставува важен чекор кон остварување на тие цели.
Во рамки на договорот е предвидено да се истражи можноста Велика Британија да учествува на внатрешниот пазар на електрична енергија на ЕУ, вклучително и приклучување кон европските платформи за тргување со електрична енергија во сите временски интервали (од ден однапред до интрадневна трговија). 
Исто така, е постигнат договор за поврзување на системите за тргување со емисии на јаглерод (ETS). Кога ова ќе биде имплементирано, емисиските единици издадени од ЕУ или Велика Британија би можеле да се признаваат меѓусебно во двата системи.
Според студија од 2024 година, подобрата координација на ETS системите би можела да донесе заштеди до 44 милијарди евра годишно до 2040 година, преку пониски трошоци за електрична енергија. Дополнително, би можела да придонесе за намалување на емисиите на стакленички гасови за околу 24% во истата година.
Договорот предвидува и меѓусебно изземање од механизмот за прилагодување на јаглеродот на границите (CBAM), што ќе отстрани пречки за трговијата не само со електрична енергија, туку и со челик, цемент и алуминиум – клучни материјали во синџирите на снабдување за развој на ветерната енергија.
