Обединетите Арапски Емирати (ОАЕ) преку државната енергетска компанија „Аднок“ (ADNOC) подготвуваат изградба на нов мултифункционален нафтовод кој ќе овозможи извоз на бензин, дизел и авионско гориво без користење на Ормускиот Теснец, една од најважните, но и најризични поморски рути во светот.
Одлуката доаѓа во време кога конфликтот со Иран и нестабилната безбедносна состојба во регионот сериозно го ограничуваат транспортот низ теснецот, преку кој вообичаено поминува околу една петтина од светската трговија со нафта.
Потпретседателот за трговија во ADNOC, Филип Кури, изјави дека компанијата активно работи на зајакнување на своите канали за снабдување за да обезбеди континуирана и конкурентна испорака на енергенси дури и доколку кризата продолжи подолг период.
„Интензивно анализираме како да ги зајакнеме нашите системи и транспортни рути за да можеме сигурно да ги снабдуваме клиентите и во услови на продолжена криза“, изјави Кури.
ОАЕ веќе располагаат со нафтовод што ги поврзува нафтените полиња во Абу Даби со пристаништето Фуџеира на источниот брег. Сепак, неговиот капацитет е ограничен на 1,5 милиони барели дневно, а пристаништето во последните месеци често беше цел на напади, што дополнително ги отежнува извозните операции.
Поради тоа, ADNOC веќе работи на втор нафтовод до Фуџеира, со кој капацитетот ќе се удвои од почетокот на следната година. Новиот проект, кој ќе пренесува различни видови рафинирани горива, ќе биде следниот голем инфраструктурен чекор на компанијата.
Според извори запознаени со плановите, нафтоводот ќе функционира по принцип сличен на американскиот „Colonial Pipeline“, кој транспортира различни видови горива низ единствен систем.
Кризата дополнително ја нагласи зависноста на земјите од Блискиот Исток од Ормутскиот Теснец. Во моментов само Саудиска Арабија и ОАЕ имаат алтернативни нафтоводи кои овозможуваат извоз без поминување низ Персискиот Залив.
Покрај мултифункционалниот нафтовод, ОАЕ разгледуваат и изградба на нов западно-источен енергетски коридор, кој би им овозможил и на другите земји од Заливот да извезуваат нафта и деривати без зависност од Ормутскиот Теснец.
Енергетските аналитичари оценуваат дека овие проекти претставуваат стратешки обид на земјите од регионот да ја намалат геополитичката ранливост и да обезбедат постабилен извоз кон глобалните пазари.
Извор: Financial Times
