Цените на нафтата пораснаа за повеќе од 7% и повторно ја надминаа границата од 100 долари за барел, откако САД викендов најавија поморска блокада на Иран преку Ормускиот Теснец, по неуспешните преговори меѓу Вашингтон и Техеран за завршување на конфликтот.
Фјучерсите на нафтата „Брент“ се зголемија за 7,4% и достигнаа 102,23 долари за барел, додека американската WTI порасна за 7,6% на 103,88 долари.
Американската морнарица се очекува да започне со спроведување на блокадата од денес, со цел да го ограничи поморскиот сообраќај кон и од иранските пристаништа. Според соопштението на Централната команда на САД, мерката ќе важи за сите бродови, без оглед на нивната националност, но нема да се попречува транзитот кон пристаништа што не се во Иран.
Од Техеран предупредија дека секое приближување на воени бродови до Ормускиот Теснец ќе се смета за прекршување на примирјето и ќе биде санкционирано.
Ескалацијата доаѓа по пропаднатите мировни разговори и го доведува во прашање кревкото примирје постигнато минатата недела. Американскиот претседател изјави дека цените на нафтата и горивата би можеле да останат високи до ноемвриските избори во САД.
Во меѓувреме, танкерите почнаа да го избегнуваат Ормускиот Теснец, иако неколку супертанкери веќе го напуштиле Персискиот Залив во текот на викендот.
Пазарните аналитичари предупредуваат дека физичките цени на нафтата веќе се тргуваат со значителна премија и во некои случаи достигнуваат и до 150 долари за барел, што укажува на растечка неизвесност на глобалниот енергетски пазар.
Извор: Ројтерс
