Германскиот трговски ланец Лидл започна продажба на батериски систем за балконски соларни електрани по цена од околу 300 евра, дополнително поттикнувајќи го брзо растечкиот пазар на мали домашни фотонапонски системи.
Батерискиот уред, кој се продава под брендот на Лидл во германските продавници на компанијата, има капацитет од 2,2 kWh и е наменет за складирање на електричната енергија произведена од балконски соларни системи. Од компанијата наведуваат дека системот е компатибилен со 99% од balcony PV инсталациите на пазарот.
Германија веќе е европски и светски лидер во овој сегмент, со повеќе од еден милион новоинсталирани балконски соларни системи само во текот на минатата година. Популарноста на ваквите мини-електрани дополнително се зголеми откако германската влада ги либерализираше правилата за нивно приклучување и дозволи инсталирање поголеми системи со батериско складирање.
Иако максималната моќност за испорака во електричната мрежа останува ограничена на 800 W, домаќинствата со батериски системи можат да користат значително поголем инсталиран капацитет без сложени административни процедури. За поставување на системот е потребно само известување до локалниот мрежен оператор.
Балконските соларни системи стануваат сè попривлечни за европските потрошувачи поради ниските трошоци, брзата инсталација и можноста директно да се намалат сметките за електрична енергија. Со додавање батерии, корисниците можат да ја складираат произведената енергија и да ја користат во периодите кога сончевото производство е ниско, што дополнително ја зголемува енергетската независност на домаќинствата.
Се очекува Лидл наскоро да започне со работа и на македонскиот пазар, а доколку ваквите батериски системи за балконски соларни централи се најдат и во понудата кај нас, тоа би можело дополнително да го поттикне интересот за мали домашни енергетски решенија. Со растот на цените на електричната енергија и сè поголемиот интерес за енергетска независност, ваквите достапни системи би можеле да станат привлечна опција и за македонските домаќинства.
Енергетика 24
