ЕУ ја заврши 2025 година со рекордни 275 TWh соларна енергија

Европската Унија во 2025 година забележа рекорден раст на производството на електрична енергија од обновливи извори, пред сè благодарение на соларните електрани, како и рекордна продажба на електрични возила, покажуваат најновите квартални извештаи на Европската комисија за пазарите на електрична енергија и природен гас.

Производството на електрична енергија од сонце достигна 275 TWh, што претставува раст од 18% во споредба со претходната година и нов историски максимум. Во исто време, производството од офшор ветерни електрани се зголеми за 4%, односно за дополнителни 3 TWh.

Изградбата на нови капацитети од обновливи извори остана на рекордно ниво, при што во текот на 2025 година беа инсталирани речиси 70 GW нови капацитети. Најголем дел од нив се соларни електрани со 56 GW, додека ветерната енергија – копнена и офшор – беше зголемена за дополнителни 13 GW.

Рекорди беа постигнати и во секторот на електричната мобилност. Во ЕУ во текот на 2025 година се продадени 2,89 милиони нови електрични возила, што е 31% повеќе отколку во 2024 година. Во споредба со 2019 година, продажбата на електрични возила е зголемена за 177%, односно речиси тројно.

Само во четвртиот квартал од 2025 година, електричните автомобили учествувале со 22% од вкупната продажба на нови возила, што е повеќе од трипати над уделот во САД, каде електричните возила имаат пазарен удел од 7%.

Просечната берзанска цена на електричната енергија во ЕУ во 2025 година изнесувала 85 евра за MWh, што е 9% повеќе од 2024 година, но и натаму 14% пониско од нивото во 2023 година. Разликите меѓу земјите-членки остануваат значителни – од 41 евро за MWh во Финска до 116 евра за MWh во Италија.

Потрошувачката на електрична енергија во Унијата се зголемила за 1%, главно поради постудените зимски температури. Сепак, таа останува 2% под просекот од периодот 2019–2022, што покажува дека закрепнувањето на побарувачката по енергетската криза продолжува постепено.

На пазарот на природен гас, просечната големопродажна цена во 2025 година достигнала 36 евра за MWh, што е 5% повеќе во однос на 2024 година, но 22% пониско отколку во 2021 година. Зголемувањето се поврзува со прекинот на рускиот транзит на гас преку Украина на почетокот на минатата година.

Потрошувачката на природен гас во ЕУ изнесувала 339 милијарди кубни метри, што е раст од 2% во споредба со 2024 година. И покрај благото закрепнување, потрошувачката останува под нивото од 2022 година, кога започна енергетската криза. Малопродажните цени на гасот, пак, во текот на 2025 година се стабилизирале на просечни 109 евра за MWh.

ЕУ – Клучни показатели за енергетскиот пазар и електромобилноста во 2025 година

Извор: Европска Комисија