Управниот одбор на АД ЕСМ во текот на вчерашниот ден оствари работна посета на хидроелектраната „Вруток“, една од најзначајните производствени капацитети во рамки на ХЕС „Маврово“ и македонскиот електроенергетски систем.
За време на посетата, раководството направи увид во тековното работење на електраната, реализацијата на производствениот план, состојбата со одржувањето на постројките, како и во идните развојни активности и инвестициски планови.
Според податоците на АД ЕСМ, заклучно со 24 јуни, ХЕС „Маврово“ реализирал 55% од годишниот план за производство на електрична енергија. Во исто време, планираниот доток на вода за целата 2026 година веќе е целосно остварен, што, како што посочуваат од компанијата, е резултат на исклучително поволните хидролошки услови.
Врз основа на актуелните хидролошки показатели, очекувањата се дека до крајот на годината ХЕС „Маврово“ ќе го надмине годишниот план и ќе оствари околу 120% реализација на планираното производство на електрична енергија.
Во фокусот на посетата бил и третиот циклус од проектот „Ревитализација на хидроелектрани“, вреден 47,3 милиони евра. Со проектот е предвидена модернизација на електричната, машинската и хидромеханичката опрема, системите за мониторинг и придружната инфраструктура во хидроенергетските капацитети на АД ЕСМ.
Од компанијата истакнуваат дека инвестициите ќе придонесат за продолжување на работниот век на постројките, зголемување на нивната безбедност и подобрување на ефикасноста во производството, како и за зајакнување на енергетската сигурност на државата, зголемување на домашното производство на електрична енергија и забрзување на процесот на зелена енергетска транзиција.
Енергетика 24
