Милано. 10 септември 2025 – Во Милано во вторникот започна Gastech 2025, најголемиот светски собир за природен гас, течен природен гас (LNG), водород, климатски технологии и вештачка интелигенција. Настанот ги обединува лидерите на енергетските компании, носителите на политики и иноваторите од над 120 земји, со фокус на обезбедување сигурна и одржлива енергетска иднина.
На маргините на конференцијата, американскиот секретар за внатрешни работи и претседател на Националниот совет за енергетска доминација (NEDC), Даг Бургум, во интервју за Energy Connects ја претстави визијата на САД за енергетска безбедност и глобално лидерство. Тој истакна дека Вашингтон применува „смели и политики ориентирани кон иднината“ кои истовремено одговараат на моменталните потреби и поставуваат основа за диверзифицирани и отпорни енергетски системи.
„Енергетската безбедност е национална безбедност. LNG обезбедува флексибилност и стабилност на системите во услови на зголемена глобална побарувачка, особено во Европа и Азија,“ нагласи Бургум. Според него, американските LNG капацитети веќе одиграле клучна улога во намалување на европската зависност од руската енергија, со рекордни испораки во последните три години.
Мандатот на NEDC, како што објасни, вклучува олеснување на инвестициите, кратење на непотребните регулативи и развој на производството на критични минерали, меѓу кои и ретките земјени минерали, со што САД ќе ја зацврстат својата позиција не само како водечки извозник на LNG, туку и како глобален центар за обработка на клучни суровини.
„Кога дозволите се транспарентни и навремени, проектите добиваат финансирање и создаваат реални придобивки – работни места, раст и сигурна енергија,“ рече Бургум, нагласувајќи дека секое одложување на инфраструктурата е изгубена можност за економија и зајакнување на сојузништвата.
Gastech 2025 се одржува во Италија токму поради нејзината улога како „енергетска раскрсница“ помеѓу Европа, Медитеранот и Африка. „Милано е центар на индустријата и иновацијата, совршено место за разговори за иднината на енергетиката,“ порача американскиот секретар, додавајќи дека очекува конференцијата да донесе „јасност и прагматизам“ во глобалните политики.
„Транзицијата кон почисти извори на енергија нема да успее само со амбиција. Потребни се стабилни синџири на снабдување, сериозни инвестиции и вистински партнерства. Ако се движиме во таа насока, можеме да обезбедиме енергија која е сигурна, достапна и со пониско јаглеродно влијание – за целиот свет,“ заклучи Бургум.
Извор: EnergyConnects.com
