Европската Унија во моментов нема непосреден ризик за снабдувањето со природен гас во текот на зимата 2026-2027 година, оцени Работната група за Енергетската унија по анализата на состојбите на нафтените и гасните пазари и подготовките за претстојната грејна сезона.
На состанокот, на кој учествуваа високи претставници на Европската комисија и земјите-членки, беше разгледано влијанието на случувањата на Блискиот Исток врз европските енергетски пазари.
Според Европската комисија, целите за полнење на складиштата за природен гас и натаму се достижни пред почетокот на зимската сезона, што обезбедува соодветно ниво на подготвеност. Дополнителна сигурност, според Комисијата, обезбедуваат и расположливите капацитети на ЕУ за увоз на течен природен гас (ЛНГ), кои ќе овозможат поголема флексибилност во задоволувањето на зимската побарувачка.
Работната група оцени дека снабдувањето со авионско гориво засега останува стабилно, благодарение на зголеменото производство во европските рафинерии и обезбедените испораки од други региони, иако состојбата и натаму е неизвесна поради геополитичките тензии.
Во однос на природниот гас, беше констатирано дека цените и понатаму се повисоки отколку пред почетокот на конфликтот на Блискиот Исток, но нестабилноста на пазарот останува релативно ниска, а ценовните нивоа се значително под оние забележани за време на енергетската криза во 2022 година.
Европската комисија соопшти дека ќе продолжи внимателно да ја следи состојбата на нафтените и гасните пазари и, доколку биде потребно, ќе ги координира мерките со земјите-членки.
Според Комисијата, од почетокот на конфликтот на Блискиот Исток во февруари, Европската Унија потрошила дополнителни околу 53 милијарди евра за увоз на фосилни горива. Поради тоа, Брисел останува на стратегијата за постепено напуштање на фосилните горива и забрзување на електрификацијата преку зголемено користење домашни обновливи извори на енергија.
Во наредниот период Европската комисија ќе го објави првиот Акциски план за електрификација, како и законски предлог за реформа на сметките за електрична енергија. Истовремено, започната е и ревизија на Директивата за задолжителни резерви на нафта, со цел зајакнување на европската рамка за енергетска безбедност во услови на новите геополитички ризици.
Извор: Европска комисија
