Европската инвестициска банка (ЕИБ) ќе обезбеди 100 милиони евра за изградбата на големата соларна електрана „Дама Солар“ во округот Арад, западна Романија. Вкупната вредност на инвестицијата се проценува на 728 милиони евра.
Проектот на компанијата „Резолв Енерџи“ предвидува изградба на соларна централа со инсталирана моќност од околу 1,3 GWp, со што таа ќе биде меѓу најголемите соларни електрани во Европа.
По пуштањето во работа, централата се очекува годишно да произведува доволно електрична енергија за потребите на повеќе од 280.000 домаќинства, односно за население од близу еден милион луѓе.
„Дама Солар“ ќе биде приклучена на високонапонската електроенергетска мрежа на Романија, што ќе овозможи произведената електрична енергија да се испорачува во националниот систем.
„На Европа ѝ е потребна повеќе чиста енергија, и тоа во голем обем. Дама Солар ќе додаде значаен нов извор на обновлива електрична енергија во романскиот енергетски систем, а истовремено ќе донесе инвестиции и работни места во регионот“, изјави потпретседателот на ЕИБ, Јоанис Цакирис.
Тој посочи дека проектот покажува како европските инвестиции може истовремено да придонесат за енергетската сигурност, климатските цели и регионалниот развој.
Изградбата во следните три години се очекува во периодот на најголема активност да ангажира околу 1.500 работници. Проектот се реализира во округот Арад, кој е меѓу кохезиските региони на Романија, а од ЕИБ очекуваат инвестицијата да создаде и дополнителна економска активност во регионот.
Проектот предвидува и обновување на природата на површина од 82 хектари. Дел од земјоделското земјиште со понизок квалитет ќе биде претворено во пасишта, а за одржување на вегетацијата ќе се користат овци. Целта е да се обноват деградираните степски тревни површини и да се обезбеди живеалиште за диви животни и заштитени видови птици.
„Исклучително сме задоволни што го достигнавме финансискиот пресврт на овој значаен проект. Финансирањето од ЕИБ, поддржано преку „InvestEU“, одигра клучна улога во обезбедувањето на поширокиот финансиски пакет“, изјави Јан Витон, директор за финансирање во „Резолв Енерџи“.
За 520 MW од капацитетот на централата се обезбедени два 15-годишни договори за разлика (CfD). Останатата произведена електрична енергија е планирано да се продава на пазарот, како и на комерцијални и индустриски потрошувачи преку долгорочни договори.
Проектот е дел од напорите на Романија за зголемување на производството од обновливи извори, намалување на емисиите на стакленички гасови и зајакнување на енергетската сигурност.
„Резолв Енерџи“, компанија основана во 2022 година од инвестициската компанија „Актис“, има портфолио од 2,8 GW проекти за производство на електрична енергија од обновливи извори во Југоисточна Европа, во различни фази – од работа и изградба до напредна фаза на развој.
Извор: EIB.org
