Соединетите Американски Држави влегуваат во нов бран на инвестиции во чиста енергија, откако американската Администрација за енергетски информации (EIA) објави дека до крајот на февруари 2027 година во земјата ќе бидат додадени повеќе од 80 гигавати (GW) нови соларни, ветерни и батериски капацитети.
Според анализата, обновливите извори продолжуваат силно да го зголемуваат својот удел во вкупниот електроенергетски систем на САД. Нивното учество во инсталираните капацитети, кое во март 2026 година изнесувало 33,4%, се очекува да порасне на 36,6% до февруари 2027 година.
Најголем раст се предвидува кај соларната енергија, со нови 42.628 мегавати, со што нејзиниот удел ќе се зголеми од 12,7% на 15,5%. Ветерната енергија ќе добие дополнителни 14.507 мегавати, вклучително и 4.155 мегавати офшор ветерни паркови.
Во истиот период, фосилните горива и нуклеарната енергија ќе бележат пад од речиси 5 GW, а нема да има нови нуклеарни капацитети.
Батериското складирање бележи експлозивен раст
EIA прогнозира дека капацитетите за батериско складирање на електрична енергија ќе пораснат за 51,4% – од 44.630 MW на 67.549 MW. Ова се смета за клучен чекор за стабилизирање на мрежата и интеграција на поголем број обновливи извори.
Комбинирано, обновливите извори и батериските системи ќе обезбедат околу 86.370 MW нов чист енергетски капацитет.
Производството од обновливи извори веќе расте
Во првите два месеци од 2026 година, производството на електрична енергија од обновливи извори пораснало за 10,8% и учествувало со 26% во вкупното производство, наспроти 23,6% во истиот период лани.
Најголем раст е забележан кај соларната енергија (+23,2%), хидроенергијата (+22,9%) и малите соларни системи, како што се кровните панели (+11,4%).
Дополнително, производството од соларни и ветерни електрани повторно било поголемо од производството од јаглен или нуклеарна енергија поединечно.
Извор: EIA.gov
