Побарувачката за електрична енергија од дата-центрите во САД ќе се зголеми повеќе од двојно до 2027 година, поттикната од забрзаната изградба на инфраструктура за вештачка интелигенција (AI), покажува најновата анализа на Goldman Sachs Commodities Research.
Според прогнозите, потрошувачката на електрична енергија на американските дата-центри ќе порасне од 31 гигават (GW) во 2025 година на 41 GW во 2026, а потоа на дури 66 GW во 2027 година. Аналитичарите Хонгцен Веи, Даан Струјвен и Саманта Дарт наведуваат дека овој раст се темели на очекувањата вкупниот капацитет на дата-центрите во САД до крајот на 2027 година да достигне околу 95 GW, повеќе од двојно во однос на нивото од крајот на 2025 година.
Клучен двигател на овој бум е експлозивниот раст на побарувачката за AI-компјутерска моќ, што предизвикува масовна изградба на нови дата-центри низ земјата.
Сепак, извештајот предупредува дека голем дел од најавените проекти нема да бидат реализирани навреме. Историски гледано, само околу 72% од планираните дата-центри биле пуштени во употреба во предвидениот рок. Голдман Сакс проценува дека во следната година навреме ќе бидат завршени околу 60% од планираните капацитети, а во период од две години тој удел би можел да падне на само 50%.
Главни причини за доцнењата се недостигот на работна сила, проблемите во синџирите на снабдување и долгите рокови за изградба, бидејќи за еден модерен дата-центар обично се потребни од 18 до 24 месеци по добивањето на дозволите.
Најголем притисок врз електроенергетските системи се очекува во регионите Mid-Atlantic, Mid-Continent и Northwest, каде што растот на побарувачката не е проследен со доволно нови производствени капацитети. Анализата предупредува дека овие региони би можеле да се соочат со ризици за стабилноста на мрежата, па дури и со ограничување на идни дата-центри.
Од друга страна, Тексас и Џорџија се сметаат за подобро подготвени за новиот бран инвестиции, благодарение на значајните планови за изградба на дополнителни енергетски капацитети.
Според Голдман Сакс, уделот на дата-центрите во вкупната летна врвна потрошувачка на електрична енергија во САД ќе порасне од 4,1% во 2025 година на 8,5% во 2027 година. Тоа дополнително ќе го затегне американскиот енергетски пазар и може да предизвика раст на цените на струјата и поголеми предизвици за стабилноста на електроенергетската мрежа.
Аналитичарите сепак нагласуваат дека прогнозите носат значителна неизвесност. Можно е дел од проектите да бидат откажани или одложени, но исто така постои и можност нови AI-инвестиции дополнително да го забрзаат темпото на изградба и да ја надминат сегашната прогноза.
Извор: GoldmanSachs.com
